Ermənistanın baş naziri Nikol Paşinyan son çıxışında Rusiya ilə bağlı maraqlı fikirlər söyləyib. Əvvəlcə, deyib ki, Rusiyadan Su-30 qırıcı təyyarələrini alıblar. Ancaq raket almağa vaxtları çatmayıb, savaş başlayıb. Ardınca isə Moskvanın, həqiqətən, Ermənistanın strateji müttəfiqi olduğunu və müharibə zamanı oradan kifayət qədər hərbi dəstək aldıqlarını vurğulayıb. Sonra da əlavə edib: “Amma unutmamalıyıq ki, Rusiya Azərbaycanın da düşməni deyil”. Sözügedən ziddiyətli bəyanatlar Paşinyanın hələ “sakitləşmədiyini” göstərir. O, yenə də reallıqları qəbul etmir və yalnız özünün inandığı ssenari ilə “diplomatik həmlələr” edir.
![](https://sherg.az/uploads/editor/3cb5429e9e071de1810df005e26e2937.jpg)
“Atlas” Araşdırmalar Mərkəzinin rəhbəri, politoloq Elxan Şahinoğlu baş nazirin niyyətini “Sherg.az”a izah etdi:
“Nikol Paşinyan bu iki cümləsi ilə xalqına Rusiyanın Ermənistana dəstək verdiyini çatdırmaq istəyib. Lakin ölkəsini bütün təhlükələrdən də sığortalamayıb. Məsələn, təyyarələrlə bağlı sitat buna sübutdur. Bildiyiniz kimi, raketlərsiz bahalı qırıcı təyyarələr konserv bankasından başqa işə yaramır. Əslində Paşinyan dolayısıyla cəmiyyətinə onu da demək istəyir ki, Rusiya Ermənistana vassalı kimi baxır. Əks halda Azərbaycanla müharibədə havaya qalxa bilmələrindən ötrü təyyarələrin raketlərini də verərdi”.