Ermənistanda 12 vergi məmuru həbs edilib. Bu barədə Milli Təhlükəsizlik Xidmətindən bildirilib. Qeyd olunub ki, buna onların rüşvət alması səbəb olub.Kütləvi həbsin təfərrüatları, o cümlədən məmurların adları hələ açıqlanmayıb.
Hadisələrə başqa prizmadan yanaşmalı olduğumuzu deyən Siyasi İnnovasiya və Texnologiya Mərkəzinin sədri, politoloq Mübariz Əhmədoğlu "Sherg.az"a bildirib ki, Paşinyanın Ermənistanda apardığı cinayət xarakterli addımları Robert Köçəryanın hakimiyyətə gəldiyi dövrlə müqayisə etmək olar:
"O hakimiyyətə gələndə baş prokuror və onun müavini kimi vəzifəli şəxslər kabinetlərində güllələndi.
Hətta onun döyüş yoldaşı kafedə "Hey Robiç necəsən?" dediyi üçün döyülərək öldürüldü.
Daha sonra Ermənistan parlamentindəki terror hadisəsi də Köçəryanın işi idi. İndi Paşinyanın gördüyü işlər də bununla müqayisə oluna bilər.
Lakin Paşinyanın Köçəryandan fərqi odur ki, Ermənistan cəmiyyətində anti-demokratik addımlar törətməsinə baxmayaraq Qərb ona dözür. Səbəbsə onun Qərbi Azərbaycanla razılaşmaya gedəcəyinə dair vədlər verməsidir.
Buna görə də Qərb Paşinyana Azərbaycanla razılaşmaya gedə biləcək yeganə adam kimi baxır və hər şeyə dözür. Lakin Paşinyanın məqsədi Qərbi aldadaraq anti-demokratik addımlar atmaqdır".
Analitik qeyd edib ki, Paşinyan "Daşnak" partiyasını ləğv etməyi planlaşdırır:
"Ermənistanın baş naziri Daşnak partiyasını bağlamaqla Levon Ter-Petrosyanın atdığı addımları Avropanın yadına salır.
Çünki Petrosyan o vaxtı "Mən daşnakları həbsə atmasam Azərbaycanla razılaşmaya gedə bilməyəcəm" demişdi.
İndi Paşinyan da daşnakları həbs edərək Avropa və Qərbə mesaj verir.
Amma onun siyasətçiləri həbs etdirməsi və məxfi orqanı bağlatdırması anti-demokratik addımdır. Hətta onun lisenziyasını ləğv etdiyi televiziya Vardanyan tərəfindən satın alınmışdı.
Hələ o zaman Vardanyan Qarabağa gəlməmişdi. Qərb buna da susdu. Ümumiyyətlə Paşinyanın siyasəti bilməməsi və apardığı anti-demokratik siyasət onun qanından irəli gəlir".
