Milli Məclisin Mədəniyyət Komitəsinin sədri Fazil Mustafa “Şərq” qəzetinin qurucu-baş redaktoru, “Azərbaycan Türk Ocağı”nın başqanı, Mətbuat Şurası İdarə heyətinin üzvü, Əməkdar jurnalist Dr. Akif Aşırlını 55 illik yubileyi ilə bağlı təbrik edib. Təbrik məktubunda deyilir:
“Hörmətli Akif müəllim,
Sizi 55 illik əlamətdar yubileyinizlə bağlı təbrik edir, elmi, ictimai və yaradıcı fəaliyyətinizdə yeni uğurlar diləyirəm!
Siz ölkəmizin özünəxas zəngin mədəni yaradıcılıq gələnəyinə sahib Qazax rayonunun Daş Salahlı kəndində boya-başa çatmış, ən qocaman ali təhsil ocağımız olan Bakı Dövlət Universitetində təhsil almısınız.
Siz hələ orta məktəb illərindən başlayaraq dövri mətbuatda müxtəlif tür və mövzuda olan yazılarla çıxış etmisiniz. 1996-cı ildə “Şərq” qəzetini təsis etmişiniz; ondan öncə bir sıra digər qəzetlərdə peşəkar jurnalistlik fəaliyyəti ilə məşğul olmusunuz.
“Ağlama, Damcılı bulağı”, “Türkün Xocalı Soyqırımı”, “Nəriman Nərimanovun Kremldə qətli”, “Cümhuriyyət mətbuatında Qafqaz İslam Ordusu”, “Sarıqamış əsirlərinin dramı – Nargin”, “Azərbaycanda Türk Ocağı”, iki cildlik “Azərbaycan mətbuatı tarixi” kitablarının müəllifi, “Bağanis-Ayrım Soyqırımı” kitabının həmmüəllifisiniz. Əsərlərinizin bir neçəsi qardaş Türkiyədə, habelə Gürcüstan, Ukrayna və başqa ölkələrdə yayınlanıb.
Qafqaz Türk-İslam Ordusu, Cumhuriyyət dönəmi və mətbuat tarixmiz sizin elmi əsərlərinizə, araşdırmalarınıza mövzu olub. – Çoxsaylı elmi-publisistik məqaləniz elm, mədəniyyət və ictimai xadimlərin, gənc araşdırmaçıların marağına səbəb olub.
Siz Mətbuat Şurası İdarə heyətinin, Azərbaycan Yazıçılar Birliyinin üzvüsünüz, digər ictimai görəvlər daşıyırsınız və öz fəal ictimai mövqeyinizlə seçilirsiniz. 2019-cu ildə bir qrup aydınımızla birgə (1918-1920-ci illərdə mövcud olmuş) “Azərbaycan Türk Ocağı”nı bərpa etmisiniz və bu ictimai birliyin başqanısınız.
2005-ci ildə jurnalistikanın inkişafında xidmətlərinizə görə Azərbaycan Respublikası Prezidentinin Sərəncamı əsasında “Tərəqqi” medalı, 2018-ci ildə “Azərbaycan Xalq Cümhuriyyəti - 100” yubiley medalı, 2020-ci ildə isə Əməkdar jurnalist fəxri adı ilə təltif olunmusunuz.
Baş qərərgahı Anakarada yerləşən “Türk Ocağı” Yönətim Kurulunun qərarı ilə 2022-ci ildə “Yusuf Akçura” ödülünə, bir sıra digər ictimai ödüllərə layiq görülmüsünüz.
Sizi yaradıcılıq uğurlarınız və yubileyinizlə bağlı Mədəniyyət Komitəsi adından bir daha təbrik edir, ən xoş diləklərimizi yetirirəm”!
