“Azərbaycanlılarla gürcüləri, müsəlmanlarla xristianları üz-üzə qoymaq istəyənlər, şübhəsiz ki, Fransanın agentləri və erməni təxribatçılarıdır”
Gürcüstanın Samtsxe-Cavaxetiya bölgəsindəki Adıgeni kəndində xristian dini icmasının bəzi nümayəndələri müsəlmanlara qarşı zorakılıq tətbiq ediblər, müsəlmanların namaz qılmasına mane olublar. Bu isə ölkənin rəsmi qurumlarını hərəkətə gətirib. Hadisə ilə bağlı ilk olaraq Gürcüstan Müsəlmanları İdarəsi bəyanat yayıb. Bəyanatda deyilib ki, dini etiqad azadlığı Gürcüstan Konstitusiyası ilə qorunur. Buna uyğun olaraq, hər bir vətəndaş Konstitusiyaya və bir-birinin, müxtəlif millətlərin və dinlərin nümayəndələrinin dəyərlərinə hörmətlə yanaşmalıdırlar.
Milli Cəbhə Partiyasının sədr müavini, ilahiyatçı Tural İrfan "Sherg.az"a açıqlamasında deyib ki, Gürcüstanda ara-sıra belə məsələlər olsa da, bu məsələ indiki zamanda məqsədyönlü şəkildə, süni olaraq həyata keçirilir. Ekspertin sözlərinə görə, şübhəsiz ki, əgər Gürcüstan qonşuluq münasibətlərinə sadiq qalmaq istəyirsə, gərək dini tolerantlıq ənənələrini də qorusun:
"Məlumdur ki, Fransa əsasən Azərbaycanın Qarabağ zəfərindən və torpaqlarımızın işğaldan azad edilməsindən sonra Azərbaycan və Türkiyəyə qarşı xüsusi düşmənçilik siyasəti yürüdür. Bu da onu hətta İranla belə ortaq mövqelərdən çıxışlar etməyə, Ermənistana silah verməyə qədər gətirib çıxarıb. İnanıram ki, Gürcüstandakı bu süni qarşıdurma Avropadan qaynaqlanır. Başda Fransa olmaqla islamofobiyanın artırılması, bəhanələr ilə müsəlmanlara təzyiq göstərmək, əslində, gizli səlib yürüşünün detallarıdır. Gürcüstanda azərbaycanlılarla gürcüləri, müsəlmanlarla xristianları üz-üzə qoymaq istəyənlər, şübhəsiz ki, Fransanın agentləri və erməni təxribatçılarıdır".
İlahiyyatçı bəyan edib ki, Gürcüstan müsəlmanlarının demək olar ki, hamısı İran təbliğat maşınının qurbanlarıdır: "İranın yaydığı ideoloji xətt nəinki müsəlmanlara, hətta başqa dinlərin mənsublarının inancına da tamamilə zidd və düşmənçilik aşılayır. Radikal və nifaq, ikitirəlik niyyəti ilə İranın uzun müddət oradakı təbliğatı səbəb olub ki, Gürcüstanda müsəlmanlar İran, fars ideologiyasının qurbanlarına çevrilirlər. Din pərdəsi altında, əslində, İran Gürcüstan müsəlmanlarını Azərbaycandan ayırıb özünə daha çox bağlamaq istəyir. O müsəlmanlar İranda oturan siyasiləri tanrı kimi qəbul edirlər, onlara pərəstiş edirlər, xüms, zəkat, vergi verirlər... Bu da münasibətlərin gərginləşməsinə marağın tərkib hissəsidir. Fransa ilə İran eyni hədəfə vurur. Eyni məqsədə doğru müxtəlif yollarla irəliləyirlər.
Məqsəd Gürcüstanda müsəlmanlar ilə xristianları qarşı-qarşıya gətirib islama qarşı savaş açmaq, Türk dünyasının başını qatmaqdır. Azərbaycanın qonşularla münasibətlərinə xələl gətirmək istəyən bu qüvvələr inanıram ki, bir nailiyyət əldə etməyəcəklər. İran da, Fransa da Gürcüstanda uduzacaq. İslama savaş açmaq, Türk Dövlətləri Təşkilatının vəhdətinə qarşı təxribat, islamofobiya addımları gücsüz, haqsız və əsassız olduğu üçün iflasa məhkumdur".
