Ukraynanın xarici işlər naziri Andrey Sibiqa ABŞ dövlət katibi Marko Rubio və avropalı tərəfdaşları ilə telefon danışığı zamanı təhlükəsizlik zəmanətləri və sülhə doğru gələcək addımlarla bağlı Kiyevin mövqeyini açıqlayıb.
Oxu.Az-ın xəbərinə görə, bu barədə o, öz "X" hesabında etdiyi paylaşımda yazıb.
"Biz istənilən formatda və istənilən ölkədə liderlərin görüşlərinə açığıq. Bizim məqsədimiz qətlləri dayandırmaq və diplomatiyaya real şans verməkdir", - deyə Ukrayna XİN rəhbəri vurğulayıb.
Onun sözlərinə görə, Rusiya başa düşməlidir ki, prosesi sonsuza qədər uzatmaq mümkün olmayacaq.
Andrey Sibiqa vurğulayıb ki, Moskva sülh yolunda real və konstruktiv addımlar atmaqdan imtina edərsə, sanksiyaların artması və Ukraynanın müdafiə potensialının daha da gücləndirilməsi ilə üzləşəcək.
Ukrayna Xarici İşlər Nazirliyinin rəhbəri, həmçinin təsdiqləyib ki, Kiyev aydın, hüquqi qüvvəyə malik və effektiv təhlükəsizlik zəmanətləri tələb edir. O əlavə edib ki, bu zəmanətlər hərbi, diplomatik, hüquqi və digər komponentləri əhatə etməlidir.
Sibiqa ayrıca qeyd edib ki, Ukrayna ordusu istənilən zəmanətin əsasını təşkil edir, onun gücləndirilməsi isə dövlətin əsas prioritetidir.
