Bakı Təşəbbüs Qrupu (BTQ) yarandığı gündən hər zaman dialoqu və sülh yolu ilə problemlərin həllini rəhbər tutur.
APA xəbər verir ki, bu barədə BTQ-nin icraçı direktoru Abbas Abbasovun Fransanın dənizaşırı ərazilər naziri Manuel Valsa ünvanladığı məktubda deyilir.
Abbas Abbasov məktubunda Valsın Kanakiyə səfərinin bölgədə vəziyyətin yerində öyrənilməsi və kanak xalqının tələblərini dinləmək baxımından təqdirəlayiq olduğunu vurğulayıb:
“Heç bir proses sonsuz ola bilməz və siz də yəqin ki, qəbul edərsiniz ki, danışıqlar nəticəyönümlü olmalıdır. Bu kontekstdə 1946-cı ildən açıq qalan və xüsusilə 1988-ci ildə imzalanmış Matinyon sazişindən bəri Fransa hökumətinin öz öhdəliklərini yerinə yetirməkdən yayınması kanak xalqı kimi dekolonizasiya üzrə beynəlxalq QHT olan Bakı Təşəbbüs Qrupunu da ciddi narahat edir”.
BTQ-nin rəhbəri BTQ-nin danışıqlara yeni nəfəs və töhfə vermək üçün Fransa hökuməti ilə Kanaki arasında danışıqlarda tərəfsiz vasitəçilik təşəbbüsünü irəli sürdüyünü bildirib:
“Kanak xalqının mütləq əksəriyyətinin təşkilatımıza olan etimadını, eləcə də dekolonizasiya sahəsində beynəlxalq təcrübəmizi nəzərə alaraq, təklifimizə müsbət reaksiya verəcəyinizə ümid edirik. Öz fəaliyyətini beynəlxalq hüququn norma və prinsipləri üzərində quran təşkilatımızın danışıqlarda balanslı və ədalətli bir yanaşma təqdim edərək, tərəflər arasında qarşılıqlı anlaşma və əməkdaşlığın inkişafını dəstəkləyəcəyinə əmin ola bilərsiz”.
