Baş verənlər qonşu ölkənin anti-Azərbaycan siyasətindən imtina etməyəcəyinin növbəti örnəyidir
İran rəhbəri Əli Xameneinin ofisinin mətbu orqanı sayılan “Keyhan” qəzeti Qəzza məsələsi ilə bağlı dərc etdiyi məqalədə Azərbaycan Respublikasına qarşı təhdidamiz ifadələr işlədib. Məqalə “Əgər etinasızlıq etsəniz, İsraildən sonra növbə sizdədir!" başlığı ilə dərc olunub. Qəzetin əməkdaşı və yazının müəllifi Məsud Əkbəri məqalənin bir neçə yerində İsrail-Azərbaycan münasibətlərinə toxunub, İsrailin enerji ehtiyacının yarıdan çoxunun Azərbaycan nefti hesabına təmin olunduğunu vurğulayıb. Bildirilib ki, Asiyadan Hind okeanı-Ədən körfəzi-Bab əl-Məndəb boğazı və Qırmızı dəniz marşrutu vasitəsilə İsrailin Eylat limanına mal daşınmalarının qarşısı husilər tərəfindən alınır: “Qeyd etdiyimiz başqa bir strateji marşrut var, o isə Bakı-Tbilisi-Ceyhan kəməridir. Bu dəhlizin pozulması sionist rejimin bütün iqtisadiyyatında böhrana səbəb ola bilər”. Xaricdə fəaliyyət göstərən İran hökumətinə müxalif ekspertlər “Keyhan” qəzetinin bu ifadəsini kəmərə qarşı təxribat çağırışı kimi dəyərləndiriblər. Qeyd edək ki, “Keyhan”ın baş redaktoru radikal mövqeyi ilə tanınan Hüseyn Şəriətmədari birbaşa Əli Xameneinin göstərişi ilə bu vəzifəyə təyin olunub. Burada gedən yazılar İranın rəhbəri Əli Xameneinin başçılıq etdiyi mühafizəkar qanadın - SEPAH və ETTELAAT-ın mövqeyini əks etdirir.
Politoloq Elxan Şahinoğlu deyib ki, İran ali dini lideri Əli Xameneinin ofisinin mətbu orqanı sayılan “Keyhan” qəzetinin Azərbaycanı hədələyən məqalə yayımlaması qonşu ölkənin anti-Azərbaycan siyasətindən imtina etməyəcəyinin növbəti örnəyidir:
"Qəzza ilə bağlı yayımlanan məqalədə Azərbaycan İsrailə neft satmasında ittiham olunur. “Əgər etinasızlıq etsəniz, İsraildən sonra növbə sizdədir!” başlıqlı şantaj xarakterli məqalədə Azərbaycandan İsrailə neft nəqlinin dayandırılması tələb olunub. Məqalə müəllifi iddia edib ki, Azərbaycan Bakı-Tbilisi-Ceyhan boru xəttiylə İsrailə neft satışını dayandırsa, guya, İsrail iqtisadiyyatı çökəcək. Ancaq məqalə müəllifinin “Bakı-Tbilisi-Ceyhan dəhlizinin pozulması sionist rejimin bütün iqtisadiyyatında böhrana səbəb ola bilər” cümləsindəki “dəhlizin pozulması” ifadəsi Bakıya çağırışdan çox İrana bağlı terrorçu və silahlı qruplara çağırışdır ki, kənar qüvvələr nəqlə mane olsunlar. İran husilər vasitəsilə Qırmızı dənizdəki dağıdıcı fəaliyyətini indi də Azərbaycan və Türkiyə üzərindən reallaşdırmaq istəyir. Alınmayacaq".
Analitikə görə, Bakı-Tbilisi-Ceyhan boru xəttindən neft alan yalnız İsrail deyil: "İsrailə nefti biz satmasaq, başqaları satacaq. Azərbaycan BMT-dəki səsvermədə Fələstinin müstəqilliyinə səs verib, Qəzadakı müharibənin dayandırlmasına tərəfdardır, gələcəkdə bölgənin yenidən qurulmasında maliyyə dəstəyi də verməyə hazırdır. Tehran bunları kənara qoyaraq “Azərbaycana necə pislik edə bilərəm” düşüncəsindədir".
