Müharibə bitəndən sonra onun həbsi tələb olunacaq. Bunu baş nazir özü də başa düşür
İsrailin Baş naziri Binyamin Netanyahu barədə Hindistanın ingilisdilli “CNN-News18” nəşrinə müsahibəsində deyib ki, rəsmi Təl-Əvivin Qəzza zolağını ilhaq etmək niyyətində olmadığını bildirib. Netanyahu vurğulayıb ki, İsrail Qəzzanı ilhaq etməyəcək və bu əraziyə nəzarəti keçid idarəetmə orqanına verməyi planlaşdırır. O, həmçinin İsrailin hazırkı münaqişədə əsas məqsədlərini təsdiqləyib: HƏMAS-ın tamamilə məhv edilməsi və qalan bütün girovların qeyd-şərtsiz azad edilməsi.
İsrail Baş nazirinin sözlərinə görə, hərəkat üzvləri silahlarını yerə qoysa və oğurlananların hamısını azad etsə, döyüşlər tez bitə bilər.
Məlum olduğu kimi, daha əvvəl “Ynet” Netanyahunun rəhbərlik etdiyi İsrail hökumətinin Qəzza zolağının tam işğalına keçid planlarını təsdiqləməyə hazırlaşdığını bildirmişdi.
Netanyahunun səsləndirdiyi fikirlərdə diqqətçəkən bir neçə məqam var. Bunlardan birincisi onun Qəzza zolağını ilhaq etmək niyyətində olmadığını deməsidir. Fikrimcə, Netanyahu Qəzza zolağı ilə bağlı əvvəlki açıqlamasının səhv olduğunu və bunun rəsmi Təl- Əvivə qarşı təzyiqlərin artmasına səbəb olacağını anlayıb. Ona görə də sözünü dəyişdi.
İkinci bir tərəfdən, İsrailin Qəzza zolağını tam tutması o qədər də asan məsələ deyil. İsrailin buna hərbi, texniki cəhətdən imkanı çatsa da, sözügedən addım çox ciddi beynəlxalq müqavimətlə qarşılaşacaq. Avropa dövlətlərinin ard- arda Fələstini dövlətini tanımaqla bağlı səsləndirdikləri bəayanatlar da göstərir ki, beynəlxalq ictimaiyyətin Təl- Əvivlə bağlı mövqeyi getdikcə pisləşir.
Odur ki, İsrail də daha ehtiyatlı addımlar atmağa məcburdur.
Bundan başqa, Netanyahunun Qəzzanı tamamilə tutmaqla bağlı ambisiyasını açıq şəkildə səsləndirməsi siyasi səhv kimi də qiymətləndirilə bilər. İsrail gələcəkdə Qəzzaya tam nəzarəti təmin edib, bunu başqa cür əsaslandıra da bilər.
Diqqətçəkən başqa bir məqam Netanyahunun Qəzzanın idarəolunmasını keçid idarəetmə orqanına verməyi planlaşdırdığını deməsidir. Baş nazirin dedikləri əslində İsrailin Qəzzada nəzarəti təmin etməklə ambisiyalarının təzahürüdür. Aydın məsələdir ki, perspektivdə yaradılacaq keçid idarəetmə orqanı rəsmi Təl- Əvivdən asılı olacaq və onun maraqlarına xidmət edəcək. Bu isə o deməkdir ki, Netanyahu Qəzza ilə bağlı ən pis halda muxtariyyət düşünür.
Onun dediklərindən belə məlum olur ki, İsrailin HƏMAS-la bağlı planları dəyişməyib. Belə ki, Netanyahu müharibənin əvvəlində olduğu kimi hələ də HƏMAS-ı tamamilə məhv etmək iddiasındadır. Bu o deməkdir ki, Netanyahunu savaşı davam etdirməkdə maraqlıdır.
Məsələ burasındadır ki, HƏMAS-ı asanlıqla və yaxın müddətdə məhv etmək mümkün deyil. Üstəlik, nəzərə almaq lazımdır ki, HƏMAS sadəcə təşkilat deyil, həm də ideologiyadır. Bu isə o deməkdir ki, HƏMAS-ın tamamilə məhv olması üçün yüzillər lazımdır.
Ümumiyyətlə, Yaxın Şərqdə “sular yaxın zamanda durulmayacaq”. İsrail hakimiyyəti, həmçinin Netanyahunun özü xeyli dərəcədə xaosdan asılı vəziyyətə düşüb. Müharibə bitəndən sonra Netanyahunun həbsi tələb olunacaq, ən yaxşı halda isə o, iqtidarı ilə sağollaşmalı olacaq. Bunu baş nazir özü də başa düşür. Odur ki, xaoun səngiməsinə imkan vermir. Yəqin ki, Yaxın Şərqdə hələ uzun müddət “gün doğmayacaq”.
Kənan Novruzov
