Azərbaycan Respublikasının Prezidenti İlham Əliyev Macarıstanın Baş naziri Viktor Orbanın dəvəti ilə mayın 20-də Macarıstana işgüzar səfərə gəlib.
Paytaxt Budapeştin Ferents List adına Beynəlxalq Hava Limanında dövlətimizin başçısının şərəfinə fəxri qarovul dəstəsi düzülüb.
Azərbaycan Prezidentini Macarıstanın Avropa İttifaqı məsələləri üzrə naziri Yanoş Boka və digər rəsmi şəxslər qarşılayıblar.
Millət vəkili Naqif Həmzəyev Sherg.az-a bildirib ki, xüsusilə Azərbaycanın Avropanın enerji təhlükəsizliyində artan rolu kontekstində Orta Dəhliz kimi layihələrin inkışafı, Cənubi Qafqazda sülh prossesi və regional əməkdaşlıq prespektivləri kimi məsələlər mövcuddur:
"Azərbaycan və Macarıstan arasındakı bu yüksək səviyyəli görüş ikitərəfli münasibətlərin inkişafına bir sıra istiqamətlərdə müsbət təsir göstərə bilər. İki ölkə arasında mövcud olan strateji münasibətlərin daha da möhkəmləndirilməsi, ticarət dövriyyəsinin artırılması və yeni investisiya imkanlarının müəyyənləşdirilməsi vacibdir".
Millət vəkili vurğulayıb ki, bundan başqa məsələlərin müzakirə olunması da mümkündür:
"Azərbaycan qazının Macarıstana və Avropaya ixracı, Cənub Qaz Dəhlizi layihəsinin genişləndirilməsi perspektivləri kimi məsələlər də var. İnvestisiya imkanları, birgə layihələr, ticarət əlaqələrinin genişləndirilməsi yolları, Orta Dəhliz layihəsi çərçivəsində əməkdaşlıq, Azərbaycanın tranzit potensialından Macarıstanın faydalanması imkanları hər biri müzakirə məsələləridir. Azərbaycanın Avropa İttifaqı ilə münasibətlərində Macarıstanın dəstəyi, tərəfdaşlıq sazişi ilə bağlı məsələlər, Azərbaycan-Ermənistan sülh prosesi, regionda baş verən geosiyasi dəyişikliklər və təhlükəsizlik məsələləri bu görüşdə müzakirə olunacaq məsələlərdəndir. Təhsil, mədəniyyət və turizm sahəsində əlaqələrin genişləndirilməsi lazımdır. Viktor Orban və İlham Əliyev arasında şəxsi münasibətlər də iki ölkə arasında əlaqələrin inkişafına əlavə təkan verə bilər, çünki hər iki lider beynəlxalq arenada müstəqil siyasət yeritməyə üstünlük verən dövlət başçıları kimi tanınır".
Fidan Fərhad
