“Paşinyanın Minsk qrupunun buraxılması tələbi ilə razılaşması həm də o deməkdir ki, Ermənistan Qərbi Azərbaycana qayıdışı "ərazi iddiası" kimi dəyərləndirməkdən də geri çəkilir”
"Ermənistan Baş naziri Nikol Paşinyan nəhayət ki, ATƏT-in Minsk qrupunun buraxılması barədə Azərbaycanın tələbinə konstruktiv yanaşma göstərdi". Bu barədə siyasi şərhçi Aydın Quliyev deyib. Ekspert bildirib ki, nə qədər ardıcıl olacağını söyləmək hələlik çətindir. Lakin üzdə olan konstruktivlik budur ki, sülh sazişinin imzalanması ilə eyni gündə Minsk qrupunun buraxılması barədə bəyanata imza ata biləcəklərini dedi:
"XİN başçısı A.Mirzoyan bir az da irəli gedərək "hansının əvvəl, hansının sonra olmasının fərqinə varmadan 10 dəqiqə fasilə ilə imzalaya bilərik" söylədi. Azərbaycanın rəsmi olaraq bu yanaşmaya necə münasibət bildirməsi dövlət başçısının işidir. Lakin hər halda Ermənistan baş nazirinin tam fərqli şeylər dediyi vaxtlar da var idi. Məsələn, deyirdi ki, "münaqişə hələ bitmədiyi üçün Minsk qrupunun buraxılmasına ehtiyac yoxdur". Yaxud deyirdi ki, "Azərbaycan "Qərbi Azərbaycan" məsələsi altında bizə qarşı ərazi iddialarında olduğu üçün aramızdakı münaqişə hələ bitmiş sayıla bilməz". Bu, ifrat revanşist mövqe idi. Baxmayaraq ki, Qərbi azərbaycanlıların vətənlərinə qayıdışı heç bir halda Ermənistandan ərazi iddiası sayıla bilməz, ancaq nə edəsən ki, Ermənistan rəhbərliyi son günlərə qədər bunu o cür qəbul edirdi".
Analitikin fikrincə, Paşinyanın Minsk qrupunun buraxılması tələbi ilə razılaşması həm də o deməkdir ki, Ermənistan Qərbi Azərbaycana qayıdışı "ərazi iddiası" kimi dəyərləndirməkdən də geri çəkilir:
"Bu, həqiqətənmi belədirmi? Yoxsa Paşinyan Qərbi azərbaycanlıların qayıdışını ərazi iddiası kimi yozmaq üçün gələcəkdə başqa arqumentlər axtaracaq? Hələlik bilmirik. Hər şeyi Paşinyanın sülh sazişini imzalamağa nə qədər hazır olması göstərəcək. Sazişi imzalamaq üçün hazırlıq deyəndə isə təkcə Minsk qrupunun buraxılmasına imza atmaq yetərli deyil. Konstitusiyanı dəyişmək prosesinə başlamaq da vacibdir. Yox, əgər Paşinyan "sülh sazişi imzalandıqdan sonra konstitusiya dəyişikliyi bizim konstitusiya məhkəməsinin qərarından asılı olacaq" mövqeyində qalarsa, nə sülh sazişi olacaq, nə də Minsk qrupunun buraxılmasının bir mənası qalacaq".
