Yaponiya Şimali Koreyadan silah tədarükündə iştirakına görə Rusiyanın 9 şirkətinə və bir fərdi şəxsinə sanksiya tətbiq edəcəyini açıqlayıb.
Yaponiya Nazirlər Kabinetinin Baş katibi Yoşimasa Hayasi sözügedən məsələ ilə bağlı açıqlaması zamanı BMT Təhlükəsizlik Şurasının müvafiq qətnamələrinə zidd olaraq Rusiyanın Şimali Koreyadan silah transfer etməsini sərt şəkildə qınadığını deyib.
“Rusiyanın Ukraynaya müdaxiləsi davam etdiyi üçün beynəlxalq ictimaiyyətlə əlaqələndirmə son dərəcə vacibdir”, - deyə Yoşimasa Hayasi bildirib.
Yaponiya Xarici İşlər Nazirliyinin açıqlamasına görə, sanksiya tətbiq edilən şirkətlərin və fərdin Yaponiyadakı bütün əmlakları dondurulacaq. Rəsmi Tokio Kiprin 2 şirkətinə də eyni səbəbə görə sanksiya tətbiq edilməsi barədə qərar qəbul edib.
Qeyd edək ki, Rusiya-Ukrayna müharibəsi başlayandan bəri Yaponiya “Böyük yeddilər” (G7) qrupu ilə koordinasiyalı şəkildə Prezident Vladimir Putin də daxil olmaqla Rusiyanın dövlət rəsmilərinə və qurumlarına qarşı sanksiya tətbiqinə başlayıb.
Hərbi-siyasi ekspert Həşim Səhrablı "Sherg.az"a açıqlaması zamanı bildirib ki, hazırkı məqamda Rusiyanın Yaponiyaya konkret addımlarla cavab verməsi gözlənilirmir:
"Artıq yüz ildən çoxdur ki, Yaponiya və Rusiya arasında həm adalar məsələsində, həm də ümumdünya siyasətində anlaşılmazlıqlar var. Lakin bu günə kimi nə Rusiya Yaponiya üzərində, nə də Yaponiya Rusiya üzərində konkret üstünlük qura bilib. Yaponiyanın Rusiyanın 9 şirkətinə sanksiya tətbiq etməsi Uzaq Şərqdə xüsusən də Sakit okean hövzəsindəki geosiyasi gərginliyin dərinləşməsinə yol açacaq. Ümumiyyətlə Yaponiya və Rusiya arasındakı münasibətlər tarixi rəqabət prizmasından çıxıb dostluq, ən azından tərəfdaşlıq səviyyəsinə yüksələ bilər. Lakin Yaponiya və Rusiya artıq fərqli bloklarda yer almağı seçmiş kimi görünür".
Analitik əlavə edib ki, Yaponiya Qərb blokuna xüsusilə ABŞ ilə müttəfiqlik əlaqələrinə üstünlük verir:
"Buna cavab olaraq Rusiya Çin ilə bərabər Şərq blokunu formalaşdırmağa çalışır. Artıq Uzaq Şərq tamamən fikir ayrılıqlarına doğru yol alır. Yaponiyanın Rusiyanın 9 şirkətinə sanksiya tətbiq etməsi bu bloklaşmanın nəticəsidir".
