"Ermənistan, sülh müqaviləsi imzalanandan sonra həm Azərbaycan kommunikasiya sistemlərindən istifadə edərək dünyaya, xüsusi ilə də Orta Asiya, Rusiya və İrana açılacaq"
Vaşinqtonda baş tutan son görüş Cənubi Qafqazda uzun illər davam edən gərginliyin aradan qaldırılması istiqamətində mühüm dönüş nöqtəsi oldu. Azərbaycan və Ermənistan arasında onilliklərdir davam edən münaqişənin yekun həlli üçün paraflanan sülh sazişi regionda sülh və sabitliyə aparan yolun əsasını qoydu.
Bu eyni zamanda Ermənistanın beynəlxalq arenada, xüsusilə ABŞ ilə strateji tərəfdaşlıq münasibətlərində yeni mərhələyə keçməsi baxımından da böyük əhəmiyyət daşıyır. Bütün bu inkişaflar Cənubi Qafqazda qarşıdurmaların yerini əməkdaşlıq və rifahın alacağı yeni bir dövrün başlanğıcını müjdələyir.
Politoloq Oqtay Qasımov Sherg.az-a Vaşinqtonda baş tuyan görüşdən və Ermənistanın sazişdən sonra əldə edəcəyi inkişafdan danışıb:
"Vaşinqtonda keçirilən görüş Güney Qafqazda yeni mərhələnin başlanğıcı oldu. Azərbaycan və Ermənistan 40 ilə yaxın davam edən münaqişədən sonra yekun sülh sazişinin imzalanmasına doğru daha bir addım atdı-sülh müqaviləsinin mətni paraflandı. Bu, tarixi hadisə ilə bərabər Ermənistanın ABŞ ilə strateji tərəfdaşlıq münasibətləri yeni mərhələyə daxil oldu. Bundan başqa Ermənistan Zəngəzur dəhlizinin ABŞ-nin nəzarətinə verilməsinə razı oldu. Əsas məsələ odur ki, tərəflər bundan sonra bölgədə sülh və sabitlikdə maraqlı olduqlarını qeyd etdilər. Yenidən qarşıdurmalara, hərbi toqquşmalara, savaşlara yol olmadığını bildirdilər. Bundan sonrakı dönəmdə bölgədə sülh, əməkdaşlıq və rifah dönəmi olması ilə bağlı mövqe sərgilədilər".
Politoloq sazişin imzalanmasının Ermənistan üçün olduqca mühim hadisə olduğunu vurğulayıb:
"Zəngəzur dəhlizinin açılması Ermənistanın faktiki olaraq blokadadan çıxması deməkdir. Ermənistan, sülh müqaviləsi imzalanandan sonra həm Azərbaycan kommunikasiya sistemlərindən istifadə edərək dünyaya, xüsusi ilə də Orta Asiya, Rusiya və İrana açılacaq. Eyni zamanda Türkiyə üzərindən Avropaya daha rahat çıxış əldə edəcək. Rəsmi İrəvanın Türkiyə ilə münasibətləri güclənəcək. Bütün bunlar Ermənistanın həm siyasi, həm iqtisadi, həm də təhlükəsizlik baxımından mənafeyinə uyğun hadisədir".
