Azərbaycan Respublikasının Baş prokuroru Kamran Əliyev və Rusiya Federasiyasının Baş prokuroru İqor Krasnov arasında imzalanmış 2024-2025-ci illər üçün Əməkdaşlıq Proqramının icrası ilə bağlı iyunun 18-də Moskva şəhərində “Əhalinin sosial cəhətdən həssas kateqoriyalarının müdafiəsi” mövzusunda seminar və beynəlxalq məsələlərə məsul struktur qurum rəhbərlərinin ikitərəfli görüşü keçirilib.
Bu barədə Baş Prokurorluqdan bildirilib. Görüşdə Azərbaycan Prokurorluğunu Beynəlxalq hüquqi əməkdaşlıq idarəsinin rəisi Erkin Əlixanovun rəhbərlik etdiyi və tərkibinə həmin idarənin prokuroru Nigar Yəhyazadə, Dövlət ittihamının müdafiəsi üzrə idarənin böyük prokuroru Emil Mirzəyev və Cinayət təqibindən kənar icraatlar idarəsinin prokuroru Hikmət Verdiyevdən ibarət nümayəndə heyəti təmsil edib. Qeyd olunan mövzu üzrə çıxışlar edilib və bu sahədə həyata keçirilən islahatlar barədə ətraflı məlumat verilib.
Cinayət işləri üzrə hüquqi yardım və ekstradisiya sahələrində əməkdaşlıq məsələlərinin müzakirəsi məqsədi ilə beynəlxalq struktur qurumların rəhbərləri arasında görüş keçirilərək tərəfləri maraqlandıran məsələlər ətrafında faydalı fikir mübadiləsi aparılıb.
