Bələdiyyələrin vahid informasiya sistemi yaradılacaq.
Bu, Milli Məclisin bu gün keçirilən iclasında müzakirəyə çıxarılan "Bələdiyyələrin statusu haqqında" qanuna təklif edilən dəyişiklikdə əksini tapıb.
Digər dəyişikliyə görə, bələdiyyə bildirişləri elektron qaydada göndəriləcək.
Müzakirələrdən sonra qanun layihəsi səsverməyə çıxarılaraq üçüncü oxunuşda qəbul edilib.
Məsələyə münasibət bildirən “Bələdiyyələrin fəaliyyətinin təbliği” İctimai Birliyinin sədri Vüqar Tofiqli “Sherg.az”a söyləyib ki, vahid informasiya sisteminin yaradılması və bu istiqamətdə bələdiyyələrlə bağlı həyata keçirilmiş bütün tədbirlər qeyd olunan sistemin inkişafına stimul verə biləcək mühüm addımlar kimi qiymətləndirilə bilər:
“Bələdiyyələrin vahid informasiya sisteminin reallaşdırılması ümumilikdə müsbət tendensiya kimi dəyərləndirilməlidir. Belə ki, vahid informasiya sisteminin tətbiqi neqativ halların qarşısının alınmasına, idarəetmədə şəffaflığın təmin olunmasına və nəticə etibarilə bələdiyyələrin büdcə gəlirlərinin artmasına müsbət təsir göstərəcək. Nəticədə, vətəndaş və ya seçici tərəfindən edilən müraciətlərin daha operativ və effektiv şəkildə cavablandırılması mümkün olacaq. Artıq bu layihə çərçivəsində bir sıra ilkin tədbirlər icra edilmiş və müəyyən layihələr həyata keçirilib. Hesab edirəm ki, bu proseslər bələdiyyələrin institusional inkişafı istiqamətində atılmış mühüm addımlardır və bu baxımdan pozitiv qiymətləndirilməlidir”.
