Sinop həbsxanasını məşhurlaşdıran əsas səbəblərdən biri odur ki, tarix boyu buradan sadəcə 1 məhkum qaça bilib
Üzərək torpağa çıxan Emin Aladağ adlı məhkum 4 gün gizlənib, lakin günlərlə ac qaldığı üçün qəsəbəyə gələrək evlərin birindən çörək istəmək məcburiyyətində qalıb
Şansa baxın ki, məhbusun çörək üçün üz tutduğu mənzil polisin evi çıxıb
Tarixi Sinop həbsxanası Türkiyənin ən dəhşətli və qorxunc zindanı hesab olunur. Hazırda muzey kimi fəaliyyət göstərən həbsxana 1997-ci ilə qədər fəaliyyət göstərib.
“Sherg.az” Türkiyə mətbuatına istinadən xəbər verir ki, üç tərəfi dənizlə əhatə olunmuş məşhur həbsxana enli və hündür qala divarlarına sahibdir.
![](https://sherg.az/uploads/editor/45fb7aec874b95c56ed330af8aeda3da.jpg)
Sinop həbsxanasını məşhurlaşdıran əsas səbəblərdən biri odur ki, tarix boyu buradan sadəcə 1 məhkum qaça bilib. Digər cəhdlər isə uğursuz alınıb. Çünki həbsxana ətrafı qala ilə çevrələndiyi və üç yanı dənizlə əhatələndiyi üçün demək olar ki, heç kim qaçmağa cəsarət etməyib.
1970-ci illərdə həbsxanadan bayıra çıxmağı bacaran ilk məhbus edama məhkum olunmuş Emin Aladağ olub. O, ayaqqabısının içində həbsxanaya soxduğu dəmir mişarla 1 il boyunca dəmir barmaqlıqları kəsməyə nail olub. Yorğan və çarşafını cıraraq ip kimi belinə bağlayan məhkum divardan sallanaraq özünü dənizə atıb.
![](https://sherg.az/uploads/editor/dbedc386d7e97a6618d2eb0db55d6408.jpg)
Üzərək torpağa çıxan məhkum 4 gün gizlənib, lakin günlərlə ac qaldığı üçün qəsəbəyə gələrək evlərin birindən çörək istəmək məcburiyyətində qalıb. Şansa baxın ki, məhbusun çörək üçün üz tutduğu mənzil polisin evi çıxıb.
Nəticədə bir müddət gün üzü görən Emin Aladağ qandallanaraq yenidən öz “evinə” qaytarılıb. Başqa bir məhkum isə kanalizasiya borusu vasitəsi ilə dənizə çata bilib. Elə həbsxanadan qaçmağı bacarmış tək məhkum da o olub və bir daha xəbər-ətər çıxmayıb. Bu yolu ikinci dəfə yoxlayan məhkumun arzusu isə ürəyində qalıb.
Çünki qaçmağa çalışan həmin məhkum borunun dənizə axıdılan ucuna dəmir barmaqlıqların vurulmasından xəbərsiz olub. Geri qayıda bilməyən məhbus kanalizasiya xəttində boğularaq can verib.
![](https://sherg.az/uploads/editor/066aa94a8ebad9708deb6b06e358128b.jpg)
Uzun illər istifadə olunmayan həbsxananı ziyarət edənlər dəhşətə gəldiklərini gizlədə bilmirlər. Olduqca qaranlıq və rütubətli olan həbsxanada məhkumların boyun və ayaqlarını bağlamaq üçün istifadə olunan qorxuducu zəncirlər və işgəncə alətləri də muzey eksponatı kimi sərgilənir. Həbsxana divarlarında daşlara həkk olunmuş müxtəlif yazılar, cızma-qaralar da qaranlıq zindanlarda sönmüş həyatları, məhv olmuş ümidləri tərənnüm edir.
![](https://sherg.az/uploads/editor/229c3be0d1fba28ba554cde5c85036d9.jpg)
Məşhur həbsxanada Krım xanı Dövlət Giray, Sabahattin Ali, Mustafa Suphi, Nazım Hikmət və Necip Fazıl Kısakürək kimi məşhur yazar və şairlər də cəza çəkiblər. Türkiyədə dillərə dastan olmuş “Aldırma könül” mahnısının sözlərini də Sabahattin Ali həbsdə olarkən qələmə alıb.
Maraqlıdır ki, Türkiyədə ən dəhşətli həbsxana Sinopda yerləşsə də, Sinopun özündə cinayət sıfıra bərabərdir.