“Heydər Əliyev bizi yetişdirirdi. Mənim mediaya olan həvəsim o dövrdən başladı”.
Bunu “Sherg.az”a Ulu Öndərlə bağlı xatirələrini bölüşən tanınmış jurnalist, Baku TV-nin baş redaktoru Tural Museyibov deyib.
O bildirib ki, Heydər Əliyevə arxalahdıqları üçün heç kəsdən çəkinməyiblər:
“Hətta biz Naxçıvanda ondan müsahibə götürmək üçün müraciət etdik. Lakin dedilər ki, siz ona söz deyə bilməzsiniz. Mən isə “Biz deyərik siz də görərsiniz” söylədim. Çünki Heydər Əliyevin özü bu şəraiti yaratmışdı. Biz dərdimizi ona danışırdıq və hər kəs görürdü ki, bütün jurnalistlərin Ulu Öndərlə fikrini bölüşmək imkanı var. O buna çox böyük imkan yaradırdı. Hətta səfərlərdən qayıtdıqda yorğun olmasına baxmayaraq hər zaman brifinq keçirirdi və bizə deyirdi ki, köklü sualınız varsa, verin. Yəni bizi formalaşdırırdı. Biz zaman keçdikcə düşünürdük ki, ona dolğun cavab ala biləcəyimiz suallar verək. Biz onun qarşısında olanda hər kəs sual verməyə can atırdı. Heydər Əliyev isə sualları cavablandırmaqdan sanki həzz alırdı. Hətta xatırlıyıram ki, böyük bir dövlətin generalları gəlib ölkə başçılarının Heydər Əliyevdən məsləhət istədiyini demişdi. Biz onunla fəxr edirdik. Ulu öndərin qarşısında olmaq belə qürurverici idi”.
T.Museyibovun sözlərinə görə, Ulu öndər jurnalistlərə öz doğması kimi yanaşırdı:
“Heydər Əliyevin Ağcakənddə çox gözəl bir çıxışı var idi. O vurğuladı: “Gün gələcək Azərbaycan bayrağı Zəngəzurda dalğalanacaq”. Hətta o bayram çıxışı zamanı bildirmişdi: “Vaxt gələcək, biz Qarabağda oturub qələbədən danışacağıq”. O günlər artıq gəlib. Mən əminəm ki artıq Heydər Əliyevin ruhu şaddır. Cənab Prezident İlham Əliyevin sayəsində Qarabağın, Şuşanın azad edilməsini Ulu Öndər də hiss etdi. Allah Heydər Əliyevə rəhmət etsin”.
Qeyd edək ki, Prezident İlham Əliyevin qərarı ilə 2023-cü il Heydər Əliyev ili elan edilib.
