Faiq Ələkbərli: “Tarixi torpaqlarımızın sahibliyini təbliğatla daha konkret sübut edə bilərik”
Prezident İlham Əliyev AMEA-nın 80 illik yubileyində bildirib ki, təkcə XX əsrin əvvəllərində çar Rusiyası tərəfindən dərc edilmiş xəritələrə baxmaq kifayətdir, hər kəs görsün ki, indiki Ermənistan ərazisində toponimlərin mütləq əksəriyyəti Azərbaycan mənşəlidir. Dövlət başçısı qeyd edib ki, o xəritələrdə Sevan gölü adlı göl yoxdur: "O xəritələrdə Göyçə gölüdür və bütün digər bizim istifadə etdiyimiz tarixi toponimlərimiz orada öz əksini tapıb". Ölkə rəhbəri qeyd edib ki, o xəritələri biz yox, çar Rusiyası edib: "Həmin o çar Rusiyası ki, vaxtilə erməniləri İrandan və Şərqi Anadoludan gətirərək bizim Qarabağ torpağında yerləşdirib ki, burada etnik və dini tərkib dəyişsin. Ona görə biz bunu təbliğ etməliyik, tədqiq etməliyik".
Türkoloq-alim Faiq Ələkbərli "Şərq"ə bildirib ki, indiki Ermənistan adlı ərazinin tarixi Azərbaycan torpaqları olması nəinki sadəcə çar Rusiyasının sənədlərində, xəritələrində, bir çox Avropa ölkələrinin - Fransa, İspaniya, Portuqaliya, Böyük Britaniyaya aid daha əvvəlki dönəmlərə aid xəritələrdə həmin torpaqların türklərə məxsus olması faktı öz əksini tapıb:
"Çar Rusiyasında o zaman xəritələr tərtib edənlər mövcud tarixi reallıqları gözardı edə bilməzdi. İndi Ermənistan adlanan respublikanın bütün əraziləri Azərbaycana məxsus olduğuna görə, həmin yerlərdə azərbaycanlılar yaşayıb, toponimlər türklərə aid olub. Bunu inkar etmək qeyri-mümkündür. Göyçə, Dərələyəz, Zəngəzur, İrəvan və digər yurdlarımıza hayların kütləvi köçü çar Rusiyası dövründə baş verib. Düzdür, əvvəllər xristian azlıqlar olub. Ermənilərin kütləvi köçü məqsədyönlü şəkildə həyata keçirilən siyasət idi. Çar Rusiyası Osmanlı ərazisindən, Qacar dövlətindən erməniləri indiki Ermənistana köçürüb. Dini və milli tərkib türklərin, müsəlmanların əleyhinə dəyişdirilib. Ancaq bu, qeyri-təbii şəkildə baş verdiyinə görə, həqiqəti dəyişdirə bilmədilər, tarixi izləri tamamilə silmək mümkün olmadı Azərbaycan Prezidenti İlham Əliyevin AMEA-dakı çıxışında bunu xüsusi vurğulaması təbiidir. Dövlət başçısı indiki Ermənistan ərazisinin Azərbaycana məxsus olmasını xüsusi vurğuladı. Həmin ərazidə bizim milli irsimiz, dəyərlərimiz yatır. Ermənilər çox saxtakarlıq etsələr də, oradan azərbaycanlıların izini silə bilməzlər. Azərbaycan türkləri islam dinindən əvvəl də, sonra da sözügedən ərazilərin qədim sahibi olublar. Haylar Azərbaycanda xristianlığı qəbul etmiş türk tayfalarının irsini də mənimsəyiblər. Ona görə, dövlət başçısının dediyi kimi bu məsələlərə daha ciddi yanaşmalıyıq, təbliğatımızı daim gücləndirməliyik. Biz prosesi doğru-dürüst şəkildə həyata keçirsək, tarixi torpaqlarımızın sahibi olduğumuzu daha konkret şəkildə ortaya qoya bilərik".
İsmayıl Qocayev
