Londonda keçirilən danışıqlarda ABŞ və Çin nümayəndələri ikitərəfli ticarətə qoyulan məhdudiyyətlərin qismən aradan qaldırılması və nadir torpaq metallarının Çindən tədarükünün təmin edilməsinə dair sazişlərin həyata keçirilməsi planı barədə razılığa gəliblər. Bu barədə jurnalistlərə ABŞ-nin ticarət naziri Hovard Lutnik məlumat verib. Onun sözlərinə görə, qarşılıqlı rüsumların qismən azaldılmasına dair razılaşma əldə edilib. Tərəflərin razılaşdırdığı plan ABŞ Prezidenti Donald Tramp və Çin lideri Si Cinpinin təsdiqinə təqdim olunacaq. Lutnik bildirib ki, biz bu çərçivə sazişlərini ölkə rəhbərləri tərəfindən təsdiqləndikdən sonra həyata keçirməyə başlayacağıq. Şübhəsiz ki, nadir torpaq metalları və maqnitlərlə bağlı məsələnin də çərçivə icrası yolu ilə həll ediləcəyini gözləyirik. Qeyd edək ki, ABŞ nümayəndə heyətinə maliyyə naziri Skott Bessent və ticarət üzrə danışıqlar aparan Ceymison Qri də daxil idi. Çin tərəfini Baş nazirin müavini He Lifen təmsil edib.
Milli Məclisin deputatı Azər Badamov Sherg.az-a söyləyib ki, dünyanın ən iri iki iqtisadi gücü olan ABŞ və Çin arasında ticarət müharibəsi davam etməkdədir:
“Londonda keçirlən ticarət danışqlarında tərəflər may ayına qədər məbləği 100 faizi ötən qarşılıqlı rüsumları qismən azaltmaq barədə razılığa gəliblər. Amma ABŞ-nin Çinlə bağlı tətbiq olunan rüsumlarda kəskin azalmaların olacağı gözlənilən deyil. ABŞ Çin malların idxalına 145 %, Çin isə buna cavab olaraq 125 % rüsum tətbiq edib. Çinin ABŞ-yə 462 milyard dollarlıq bir ixracın olduğunu və ABŞ-dan idxalı isə 143 milyard dolarlıq bir dövrüyyə olduğuna diqqət etsək, bu ticarət müharibəsinin hər iki ölkənin iqtisadiyyatında müəyyən çətinliklərin yaradacağını deməyimizə imkan verir. Ümumiyyətlə ABŞ-Çin ticarət savaşı qlobal iqtisadiyyata da təsirsiz ötüşməyəcək. Çünki bu iki böyük iqtisadi gücün qlobal iqtisadiyyatda payı və təsir imkanları kifayət qədər böyükdür. Bütün bunları nəzərə alaraq qənaetə gələ bilərik ki, bu iki iqtisadi güc arasında müəyyən bir razılıq əldə olunmasa qlobal bazarlarda bahalaşmalrın baş verəməsi qaçılmaz olacaqdır”.
