Nə qədər ki, bu sahə icra hakimiyyətlərinin nəzarətində olacaq, vəziyyət düzəlməyəcək

Ölkəmizdə bağçalardakı vəziyyət o qədər də ürəkaçan deyil. Belə ki, valideynlərin tez-tez üzləşdiyi problemlərdən biri uşaq bağçalarında yer çatışmazlığıdır. 
Səbəb kimi uşaq sayının çoxluğu ilə əlaqədar olaraq yerlərin məhdudluğu göstərilir. Bir sözlə, bu, bağça müdirələrinin ənənəvi bəhanəsidir. Belə hallar Bakı ilə yanaşı, digər şəhər və rayonlarda da müşahidə olunur. 
Valideynlər iddia edir ki, bağça müdirləri onların uşaqlarını yerləşdirməklə bərabər, sənədləşmə üçün də ayrıca vəsait tələb edirlər. Belə olduğu halda isə bağçaların yenidən Təhsil Nazirliyinin tabeliyinə verilməsi gündəmə gəlir. Bəs, indiki şəraitdə bu mümkün ola bilərmi?

Baş verənlərlə bağlı “Şərq”ə danışan təhsil üzrə ekspert Nabatəli Qulamoğlu təəssüflə bildirdi ki, bağçalar korrupsiya fəaliyyəti ilə məşğuldur:
“Vaxtilə bağçalar Təhsil Nazirliyinin tabeliyində idi. Lakin daha sonra qərara gəldilər ki, bağçaları özəlləşdirsinlər. Hamısını deyil, korrupsiyaya meyilli bağçaları özəlləşdirdilər ki, nəzarəti Təhsil Nazirliyinin əlindən alsınlar. Bir zamanlar sabiq təhsil naziri Misir Mərdanov bağçaların ayrı-ayrı şəxslər tərəfindən ucuz qiymətə özəlləşdirilməsinə təpki göstərdi. 
Ona görə bağçaları ondan aldılar və Bakı Şəhər İcra Hakimiyyətinin (BŞİH) tabeliyinə verdilər. Bu zaman bir sıra təhsil ekspertlərimiz, onların Misir Mərdanovla şəxsi-qərəzlikləri var idi, and-aman edirdilər ki, bağçalar Təhsil Nazirliyindən alınıb BŞİH-nə verilsə, xoşagəlməz hallar yox olacaq. 
Bağçalar BŞİH-nin sərəncamına keçəndən sonra Azərbaycanın məmurları bağçaları bacısının, arvadının və ya özünün adına keçirirdilər. Digər bağçalar isə töküntü olaraq qaldı. 
Hər kəsə bəllidir ki, BŞİH pedaqoji qurum deyil. Guya bir neçə pedaqoji ştat yaratdılar və həmin ştatlar bağçaları idarə edir. Amma əslində o zamanlar Misir Mərdanov da deyirdi ki, məktəblərdə, bağçalarda rüşvəti təşkil edən icra hakimiyyətləridir. Təsəvvür edin bu sözdən sonra uşaq bağçaları icra hakimiyyətinə verilib”. 
Ekspert qeyd edib ki, uşaq bağçaları BŞİH-nin idarəçiliyinə veriləndən sonra bu qurum tam sərbəst oldu və bağçalarda korrupsiya fəaliyyətinin həyata keçirilməsi üçün sərbəstlik yarandı: “Elə o vaxtdan bəri bağçalarda korrupsiya var. Bunun da səbəbi odur ki, bağçalar Azərbaycan əhalisinin sayına uyğun deyil. Son statistik məlumata görə, ölkəmizdə cəmi 20 faiz bağça fəaliyyət göstərir. Məsələn, bir bağça 10 uşaq tutur və həmin bağçaya 25 uşaq gəlirsə, müdirə deyir ki, “pul verməsən uşağı götürmürəm. 
Səbəbini soruşanda isə deyir ki, “yer yoxdur”. Ona görə də bağçalar korrupsiya fəaliyyəti ilə məşğuldur. Nə qədər ki, bağçalar icra hakimiyətinin tabeliyindədir, o zamana qədər də bu korrupsiya davam edəcək”.