Prestijli ixtisaslarda bu il ötən illərlə müqayisədə daha çox bal artımını proqnozlaşdırırıq
Ali təhsil müəssisələrinə və tam (11 illik) orta təhsil bazasında orta ixtisas təhsili müəssisələrinə sənəd qəbulu artıq başlanıb. Abituriyentləri maraqlandıran əsas məsələlərdən biri ali təhsil müəssiəslərinə qəbul zamanı ixtisaslara görə keçid ballarının artması ilə bağlıdır.
Bu il keçid balları arta bilərmi?
Mövzu ilə bağlı "Sherg.az"a danışan təhsil eksperti Elçin Əfəndi bildirib ki, hazırda 80 mindən çox abituriyent qeydiyyatdan keçib və proses 5 mart saat 23:59 da yekunlaşacaq:
“Abituriyentləri imtahan sualları, imtahan suallarının çətinlik səviyyəsi, o cümlədən bu ilki qəbul məsələsi düşündürür. Dövlət Sosial İqtisadi proqramına baxdıqda görürük ki, plan yerlərinin həm bakalavr, həm magistratura üzrə 85 minə qədər çatdırılması nəzərdə tutulur. Bu plan yerlərindən 70 minə yaxın hissəsi məhz bakalavrı əhatə edəcək. Bu yerlərin artımı da ümumi ixtisaslar üzrə keçid ballarına təsirsiz ötüşmür. Amma bu fikir bütün ixtisasları əhatə edəcəkmi sualına birmənalı olaraq xeyir izahını tələb edir. Çünki yalnız prestijli ixtisaslarda keçid balları yüksək olur. Qalan digər ixtisaslarda isə ballarda müəyyən enmələr və yaxud da cüzi artımlar müşahidə oluna bilər. Ümumiyyətlə, ixtisaslar üzrə keçid ballarının dəyişməsinə təsir edən amillərdən birincisi, abituriyentlərin imtahan nəticələridir. İkincisi, isə plan yeridir ki, və bu da keçid ballarına təsir edəcək. Abituriyentlərin göstəriciləri yüksək olması, bu birmənalı olaraq keçid ballarının artımı deməkdir. Nəticələr aşağıdır və plan yerləri artıbsa, burada təbii ki, keçid ballarının azalması anlamını verir. Prestijli ixtisaslarda bu il ötən illərlə müqayisədə daha çox bal artımını proqnozlaşdırırıq. Birinci ixtisas qrupunda informasiya təhlükəsizliyi, informasiya texnologiyaları, kompüter mühəndisliyi, kompüter elmləri ixtisası və yeni yaranmış ixtisaslardır. İkinci ixtisas qrupunda əsasən maliyyə, biznes, beynəlxalq çərçivə, logistika ixtisasıdır. Üçüncü ixtisas qrupunda, hüquqşünaslıq, dövlət və ictimai münasibətlər ixtisasıdır. Dördüncü ixtisas qrupunda isə əsasən tibb, stomatologiya və psixologiya ixtisaslardır. Yəni bu ixtisaslarda daha çox keçid ballarında müəyyən artımların olacağını proqnozlaşdırırıq. Digər ixtisaslarda isə keçid ballarının ötən illə müqayisədə azalma və yaxud da cüzi artımı da müşahidə oluna bilər”.
