Sentyabrın gəlişi ilə məktəblər açıldı. Bəzi uşaqlar bağçaya ilk addımlarını atır, bəziləri isə təhsil həyatını davam etdirir. Lakin sentyabr ayının həm fiziki, həm də zehni yükü əsasən anaların üzərinə düşür. Bəs bu yükü azaltmaq üçün nə etmək olar?
Məktəbə qayıdış prosesi yalnız uşaqları məktəbə aparıb-gətirməkdən ibarət deyil. İdman geyimlərinin hazırlanmasından kitabxanadan götürülən kitabların vaxtında qaytarılmasına, nahar məsələsinin izlənilməsindən sinif tədbirlərinin təşkilinə qədər çoxsaylı görünməyən vəzifələr ailənin gündəlik həyatını müəyyənləşdirir.
Sherg.az xəbər verir ki, mütəxəssislərin fikrincə, bu “zehni yük” əksər hallarda anaların üzərinə düşür. Bəs nə etmək lazımdır?
“Ədalətli oyun” üsulu ilə vəzifələrin bölüşdürülməsi
Ev işlərinin və məktəblə bağlı məsuliyyətlərin daha ədalətli bölüşdürülməsi üçün təklif olunan üsullardan biri Eve Rodskinin “Fair Play” (“Ədalətli oyun”) sistemidir. Bu yanaşmada 100 konkret vəzifə müəyyənləşdirilir və valideynlər arasında bölüşdürülür. Kartlardan birini alan şəxs həmin vəzifənin bütün mərhələlərinə görə məsuliyyət daşıyır.
Mütəxəssislər hesab edirlər ki, bu üsul həm görüləcək işlərin, həm də onların planlaşdırılması və izlənməsi ilə bağlı zehni yükün daha bərabər bölüşdürülməsinə kömək edir.
Uşaqlara da məsuliyyət verilməlidir
Mütəxəssislərin fikrincə, prosesə yalnız valideynlər deyil, uşaqlar da cəlb olunmalıdır. Nahar üçün lazım olanları hazırlamaq, su qablarını doldurmaq, planşetlərini enerji ilə doldurmaq və növbəti gün üçün geyimlərini hazırlamaq kimi sadə tapşırıqlar uşaqlara həvalə edilə bilər.
Bu cür yanaşma ailədəki ümumi yükü azaltmaqla yanaşı, uşaqlarda məsuliyyət hissinin formalaşmasına da kömək edir.
Gündəlik proqramı yenidən nəzərdən keçirmək yükü azaldır
Ailələrin sıx qrafiki bəzən fərqinə varmadan əlavə və zəruri olmayan işlərlə dolur. Mütəxəssislər vaxtaşırı gündəlik proqramı nəzərdən keçirməyi və mümkün olduqda sadələşdirməyi tövsiyə edirlər.
Məsələn, naharı evdə hazırlamaq əvəzinə uşağın məktəbdə yeməsinə üstünlük vermək, məktəbdənkənar ödənişləri avtomatik ödəniş sisteminə keçirmək və ya müəllimlərə əl işi hədiyyələr hazırlamaq əvəzinə hədiyyə kartı təqdim etmək kimi kiçik dəyişikliklər valideynlərin zehni enerjisinə qənaət etməyə imkan verə bilər.
Mütəxəssislər vurğulayırlar ki, yeni dərs ili başlayarkən ailələr gündəlik həyatlarında kiçik dəyişikliklər etməklə həm üzərlərindəki yükü azalda, həm də daha davamlı və balanslı iş bölgüsü yarada bilərlər.
