Bunun sayəsində iştirakçılar artıq rahatlıqla imtahana hazırlaşa biləcəklər
Təhsil İnstitutu müəllimlərin işə qəbulu müsabiqəsinin qiymətləndirmə çərçivəsini müəyyən edən sənədlər toplusu hazırlayıb. Təhsil Nazirliyindən verilən məlumata görə, sənədlər toplusu ümumi və tam orta təhsil müəssisələrində fəaliyyət göstərən və ya göstərmək istəyən mütəxəssislər üçün nəzərdə tutulub. Həmin sənədlər 19 fənni, ibtidai sinif, metodika və pedaqogikanı əhatə edən məlumat kitabçasında öz əksini tapıb.
Məlumat kitabçasında hər fənn üzrə qiymətləndirmənin əsas məzmun sahələri və bu sahələr üzrə istifadə olunacaq tapşırıqların sayı göstərilib, iddiaçıların müsabiqəyə hazırlığına yardım etmək üçün müxtəlif fənlər üzrə əsas mövzular verilib. Bu, həm müsabiqə iştirakçılarını test tapşırıqlarının informasiya mənbəyi ilə tanış etmək, həm də onların fənnin tədrisi üçün zəruri olan nəzəri və praktiki bacarıqlarını yoxlamaq, mövcud dərsliklərdəki mövzuları bilmə, mənimsəmə səviyyəsini ölçmək məqsədini daşıyır.
Mövzuya münasibət bildirən təhsil eksperti Kamran Əsədov "Şərq"ə açıqlamasında bildirib ki, müəllimlərlə bağlı hazırlanan yeni layihə sayəsində iştirakçılar artıq rahatlıqla imtahana hazırlaşa biləcəklər. Ekspertin sözlərinə görə, hazırlanan yeni layihənin bir çox üstünlükləri var:
"Qeyd edim ki, 2013-2019-cu illərdə ixtisas bilikləri məntiqi, düşünmə təfəkkürü və kurikulumla yoxlanılırdı. Amma 2020-ci ildən etibarən bir sıra dəyişiklik edildi. Yalnız imtahan iştirakçılarının bilikləri, eyni zamanda kurikulum bilikləri yoxlanıldı. Bu ildən Təhsil Nazirliyi tamamilə prosesi şəffaflaşdırdı və öncədən ədəbiyyat siyahısında olan proqramları müəyyənləşdirdi. Belə ki, imtahan verəcək şəxslərə artıq Təhsil İnstitutu tərəfindən düşəcək suallar və mövzular tam açıq şəkildə verilib. Beləliklə, iştirakçılar imtahanlara artıq rahatlıqla hazırlaşa biləcəklər".
K.Əsədov əlavə edib ki, burada sualların cavabları da, sualların hansı səpkidə seçilməsi də öz həllini tapıb:
"Həmçinin, imtahanda təqdim ediləcək sualların sayı, mövzular arasında bölünməsi və ağırlıq səviyyəsi də tam öz əksini tapıb. Burada milli qiymətləndirmədə test tapşırıqlarının ağırlıq səviyyəsinə görə bərabər səviyyədə qiymətləndirmə prinsipi əsas götürülür. Məhz bu gün Təhsil İnstitutu tərəfindən təqdim edilən yenilik proqramların, yəni hansı mövzuda test tapşırıqları təqdim ediləcək və tam şəkildə onların açıqlamasından ibarətdir".
