Müəllimlərin uzaq məsafələrdən işə gəlib getməsinin onların həm fiziki yorğunluğuna, həm də maddi vəziyyətlərinə ciddi şəkildə mənfi təsir göstərdiyi nəzərə alınaraq problemin həlli istiqamətində əməli addımlar atılması zərurətə çevrilir. Bu məsələ Milli Məclisdə də müzakirə edilib, deputat Fazil Mustafa müəllimlərin əmək haqqından vergi tutulmamasını təklif edib.
Məsələ ilə bağlı “Sherg.az”a danışan təhsil ksperti Kamran Əsədov qeyd etdi ki, müəllimlərin uzaq məsafələrdə dərsə gedib-gəlməsi onların dərsə hazırlığını və dərsdəki diqqətini azalda bilər:
- Hər gün uzun yol qət etmək onların enerjisini tükəndirir və fiziki yorğunluğa səbəb olur. Bu yorğunluq onların dərs prosesində daha az enerjili olmasına, şagirdlərlə interaktiv və fəal bir dərs keçməsinə, eləcədə sosial həyatlarına mane olur. Nəticədə, müəllimlərin dərs keyfiyyəti aşağı düşür və təhsil prosesi istənilən səviyyədə keçirilə bilmir, müəllimlər sosial həyatlarına daha az vaxt ayırmalı olurlar. Xüsusilə qış aylarında hava şəraitinin çətinləşməsi və yolların təhlükəli olması müəllimlərin işə vaxtında və təhlükəsiz çatmasına mane olur, bu da həm şagirdlər, həm də tədris prosesi üçün problemlər yaradır. Müəllimlərin bu problemini həll etmək üçün bir neçə tədbir görülə bilər. İlk növbədə, onların yaşadığı yerdən uzaq məktəblərdə dərs deməməsi üçün lokal iş imkanları təmin olunmalıdır. Müəllimlərin çalışdıqları bölgələrə yaxın məktəblərə təyin edilməsi və onların yaşadıqları rayonlarda işlə təmin olunması tədrisin keyfiyyətinə müsbət təsir göstərə bilər. Bu, həm müəllimlərin yol yorğunluğunu azaldar, həm də onların daha motivasiyalı və enerjili olmasını təmin edər. Müəllimlərin yolda sərf etdikləri vaxtın və xərcin azaldılması üçün dövlət və ya yerli idarəetmə orqanları tərəfindən nəqliyyat dəstəyi təmin edilə bilər. Belə bir dəstək proqramı onların yolda keçirdiyi vaxtı və xərci minimuma endirər və tədris keyfiyyətinə mənfi təsiri azaltmağa kömək edər. Bir çox ölkədə dövlət tərəfindən bu cür dəstək proqramları tətbiq olunur və müəllimlərə pulsuz nəqliyyat xidmətləri təqdim edilir.
Digər bir həll yolu isə uzaq məktəblərdə çalışan müəllimlər üçün məskunlaşma imkanlarının təmin edilməsidir. Bu, xüsusilə kənd və ucqar bölgələrdə işləyən müəllimlər üçün vacibdir. Müəllimlər üçün xüsusi yaşayış yerlərinin və ya dövlət tərəfindən təmin edilmiş yataqxanaların yaradılması onların uzun məsafələr qət etmək məcburiyyətini aradan qaldıra bilər. Müəllimlər dərs keçdikləri məktəblərə yaxın yerlərdə yaşamaqla daha rahat və enerjili bir iş mühitinə malik olarlar və bu da tədris prosesinin keyfiyyətinə müsbət təsir edər. Ümumilikdə, müəllimlərin yaşadıqları yerlərdən uzaqda dərsə gedib-gəlməsi onların iş şəraitini çətinləşdirir və tədris keyfiyyətinə mənfi təsir edir. Bu problemin həlli üçün onların çalışdığı bölgələrə yaxın yerlərdə iş imkanlarının təmin edilməsi, nəqliyyat dəstəyinin göstərilməsi və yaşayış yerlərinin yaradılması kimi tədbirlər görülməlidir. Müəllimlərin iş şəraitinin yaxşılaşdırılması, onların daha motivasiyalı və enerjili olmasını təmin edər, bu da şagirdlərin təhsil keyfiyyətinin artmasına və tədris prosesinin daha effektiv olmasına imkan yaradar.
