Apple əməkdaşlarından biri şirkəti məhkəməyə verib. Şirkəti məhkəməyə vermiş əməkdaşın sözlərinə əsasən, Apple öz əməkdaşlarını təkcə iş zamanı deyil, şirkətdən kənarda da izləyir.
Sherg.az Technote-a istinadən bildirir ki, şirkətə qarşı məhkəmə iddiasını Amar Bakta adlı Apple əməkdaşı qaldırıb. Amar Bhakta iddia edir ki, şirkət iPhone smartfonları da daxil olmaqla korporativ cihazlar üzərindən öz əməkdaşlarının məlumatlarını əldə edir.
Belə ki, Apple işçilərin şəxsi iPhone cihazlarına şirkət daxili proqram təminatını quraşdırır. Məhkəmə iddiasında qeyd edilib ki, Apple siyasətinə əsasən bu cür cihazlarla əlaqəli olan məlumatlar (elektron poçt, foto, video, qeydlər və s.) Apple tərəfindən ola biləcək axtarış proseslərində istifadə edilə bilər.
Məhkəmə iddiasını qaldırmış Amar Bhakta əmindir ki, Apple öz əməkdaşlarından şirkət siyasətinə riayət etməyi tələb etməklə Kaliforniya ştatının qanunlarını pozur. Məsələ burasındadır ki, şirkətin siyasəti ona əməkdaşların fiziki, video və elektron poçt vasitəsilə izlənməsi və o cümlədən onların cihazlarındakı məlumatların axtarışı imkanını verir.
Apple öz növbəsində qeyd edilmiş məlumatları təkzib edib və onları əsassız adlandırıb. Maraqlısı ondadır ki, bu, Apple şirkətinin daxili qaydaları ilə bağlı ilk hadisə deyil. Belə ki, hələ 2021-ci ildə kütləvi informasiya vasitələri xəbər vermişdilər ki, Apple öz işçilərinə işdə istifadə olunan cihazlarda fərdi hesablara daxil olmağa məcbur edir.
