“Bakı indiyə kimi belə yaşıllıq görməyib. Yaşıllaşdırma idarəsi nə qədər çalışsaydı da, bu cür yaşıllığa nail ola bilməzdi. Bu, təbiətin işidir, təbiətin möcüzəsidir”
Bu yay dəhşətli istilər olacaq, qış sərt keçəndə yay da isti keçir... Nənələrimizin “proqnozu”du. Yaşlılar həmişə belə deyir, yaya görə qışı, qışa görə yayı, hətta yazın ilk 4 gününü diqqətlə müşahidə edib hər günü bir fəslə bağlamaq kimi inanclar da var. Belə baxanda, nənələrin proqnozu hədəfdən çox da yayınmır. Amma dünyada qlobal isitləşmə, buzlaqların əriməsini, karbon emissiyalarının getdikcə artmasını nəzərə alsaq, yayın ümumən mülayim-isti keçəcəyini gözləmək olar. Dünyada rekord temperaturlarsa qeydə alınmaqdadır. Birləşmiş Ərəb Əmirliklərində havanın temperaturu may ayı üçün rekord səviyyəyə çatıb. "Medicina" xəbər verir ki, Milli Meteorologiya Mərkəzinin verdiyi məlumata görə, şərqdəki Sveyhan rayonunda temperatur 51,6 dərəcəyə yüksəlib, Əbu-Dabidə isə 50,4 dərəcə qeydə alınıb. Bölgədə bu il həmişəkindən daha tez kəskin istilər düşüb. Milli Meteorologiya Mərkəzinin məlumatına görə, aprel ayında orta maksimum temperatur rekordu 42,6 dərəcəyə çatıb. BƏƏ səlahiyyətliləri sağlamlıqla bağlı xəbərdarlıqlar edib və insanları günün isti saatlarında açıq havada fiziki fəaliyyətdən çəkinməyə çağırıblar. Bakıda isə yaxın 2 gündə istiliyin 28 dərəcəni keçəcəyi bildirilir.
Bəs ölkəmizdə, yaşıllıqların azaldığı, binaların çoxaldığı paytaxtımızda yay necə keçəcək?
Ekoloq Ənvər Əliyev “Sherg.az”a açıqlamasında qeyd etdi ki, adətən əvvəlcədən verilən proqnozlar təsdiqlənmir. Hazırda ölkə ərazisində havalar çox gözəl keçir. Əsl yaz havasıdır. Hazırkı hava mənə ötən əsrin 60-70-ci illərini xatırladır.
Şəhərimiz yam-yaşıldır. Bakı indiyə kimi belə yaşıllıq görməyib. Yaşıllaşdırma idarəsi nə qədər çalışsaydı da, bu cür yaşıllığa nail ola bilməzdi. Bu, təbiətin işidir, təbiətin möcüzəsidir. Bakı kimi yarımsəhra iqlim şəraitinə malik bir şəhərdə belə mənzərələrlə qarşılaşmaq olduqca xoşdur. Mən deyərdim, əksinə, yay gecikir. O ki qaldı ayrı-ayrı yerlərdə rekord istilərin qeydə alınamsına, bu, hər region, bölgə üçün spesifikdir. Məsələn, şimal yarımkürəsində, aldığım məlumatlara görə, havalar mülayim keçir. Yüksək dərəcədə istilər yoxdur. Əksinə, məsələn, Rusiyanın şimalında, Sibirdə, o cümlədən Kanadada, şimal ökələrinin bəzisində əvvəlki illərə nisbətən daha mülayim, təsərrüfatlar üçün əlverişli iqlim şəraiti hökm sürür. Ötən il bu vaxt daha isti havalar müşahidə edilirdi. Ayrı-ayrı yerlərdə maksimumlar arta bilər, bu, həmişə olub. Amma ümumən baxdıqda iqlimin qorxulu, təhlükəli tendensiyalarından şikayətlənməyə dəyməz. Bu il həddindən artıq yağıntı olub. Sututarlarda çoxlu su ehtiyatı toplanıb. Süni suvarmaya çox yerdə ehtiyac yaranmayıb. Yağıntının bol olması çox yaxşıdır, kənd təsərrüfatına faydalıdır. İndidən demək ki, yayda qızmar istilər olacaq, doğru deyil. Bakının havası dəyişkəndir. Bir həftə, 10 gün müəyyən tendensiyalar müşahidə edilir, yayda temperatur yüksəlməsi, qışda şaxtalı havalar, bir neçə gündən sonra temperatur normallaşır, külək sərinlik gətirir. Ümumən, narahat olmağa dəyməz.
