"OpenAI" məntiqi təfəkkür, proqramlaşdırma və elmi sorğulara diqqət yetirməklə mürəkkəb problemlərin həllinə yönəlmiş "o3-pro" adlı yeni dil modelini buraxıb.
Oxu.Az xəbər verir ki, bu barədə VC portalı məlumat verib.
Yeni modelə giriş artıq API vasitəsilə, eləcə də "Team" və "Pro "abunəçiləri üçün əlçatandır. Korporativ və təhsil planlarının ("Enterprise" və "Edu") istifadəçiləri gələn həftə ərzində giriş imkanını əldə edəcəklər. Bunun "ChatGPT Plus" abunəçiləri üçün əlçatan olub-olması haqqında hələlik məlumat yoxdur.
"o3-pro" modeli mətn və şəkilləri təhlil etmək qabiliyyətinə malikdir, lakin təsvirin yaradılmasını dəstəkləmir. Modelin baza məlumatları 2024-cü ilin iyun ayına qədərdir. Audioformat dəstəklənmir, lakin internetdə axtarış, faylların təhlili, "Python" proqramlaşdırma dilinin dəstəyi və öz "yaddaşı" funksiyaları həyata keçirilir.
"OpenAI"nin məlumatına görə, model "o3" versiyasını üstələməklə yüksək dəqiqlik və cavabların tamlığını nümayiş etdirir. API vasitəsilə istifadənin dəyəri bir milyon giriş tokeni üçün 20, bir milyon çıxış tokeni üçün 80 dollardır. Müqayisə üçün qeyd edək ki, "o3" modelinin qiyməti müvafiq olaraq 2 və 8 dollardır, "o1-pro" isə ən bahalı olaraq qalır - analoji həcm üçün 150 və 600 dollar.
