"Süni intellekt, rəqəmsal maliyyə sistemləri və kiber mühitlə bağlı texnoloji inkişaf korrupsiya və digər cinayətlərin yeni formalarının yaranmasına səbəb olmuşdur".
Bu fikirlər Prezident İlham Əliyevin "GlobE Network"un altıncı plenar iclas iştirakçılarına müraciətində əksini tapıb.
Dövlət başçısı qeyd edib ki, bu mürəkkəb və sürətlə dəyişən çağırışlar hüquq-mühafizə orqanları üçün qlobal miqyasda yeni və çoxşaxəli vəzifələr müəyyən edir:
"Azərbaycan bu təhlükələrin qarşısını almaq üçün beynəlxalq tərəfdaşlarla sıx əməkdaşlıq çərçivəsində öz imkanlarını gücləndirməyə sadiqdir. Əminəm ki, bu üçgünlük plenar iclas ortaq məqsədlərimizin reallaşmasına əhəmiyyətli töhfə verəcək və korrupsiyaya qarşı beynəlxalq əməkdaşlığın genişlənməsi üçün yeni imkanlar açacaqdır".
İnformasiya texnologiyaları üzrə mütəxəssis Elvin Həsənov Sherg.az-a bildirib ki, Süni intellekt və rəqəmsal maliyyə sistemlərinin inkişafı bəli, korrupsiyanın və digər kiber cinayətlərin yeni formalarının meydana çıxmasına zəmin yaradır:
“Əvvəllər fiziki formada həyata keçirilən bir çox qanunsuz əməliyyatlar bu gün texnologiyanın imkanlarından istifadə edilərək daha gizli və sürətli şəkildə həyata keçirilir. Məsələn, rəqəmsal ödəniş sistemləri vasitəsilə qeyri-rəsmi ödənişlər gizlədilə, kriptovalyutalardan istifadə edilməklə pulların izi itirilə bilər. Eyni zamanda, süni intellekt alqoritmləri ilə tender nəticələrinə təsir göstərmək, saxta məlumatlar əsasında qərar mexanizmlərinə müdaxilə etmək mümkün ola bilər. Kiber məkanda ən çox yayılan cinayətlərə şəxsi məlumatların oğurlanması, fişinq hücumları, bank kartı məlumatlarının ələ keçirilməsi, saxta mobil tətbiqlərlə vətəndaşları aldatmaq və dövlət resurslarına yönəlmiş kiberhücumlar daxildir. Bu reallıqlar fonunda hüquq-mühafizə orqanlarının hazırlığı strateji əhəmiyyət daşıyır. Sevindirici haldır ki, son illər Azərbaycanda bu sahəyə diqqət artıb, xüsusi kiber-təhlükəsizlik bölmələri yaradılıb, texniki imkanlar gücləndirilib”.
