Keçmiş ərinin sələm borcuna görə onun evini əlindən alıblar
Kərimova Mehriban Elşad qızı redaksiyamıza müraciət edərək öz şikayətini bildirib. Mehriban xanım məmur özbaşınalığından şikayətçi olduğunu və haqqının yeyildiyini bildirir.
Onun sözlərinə görə, keçmiş həyat yoldaşı faizə pul verən Hacıbəyova Sitarə Əsədulla qızından pul götürüb. Müəyyən müddət keçəndən sonra yoldaşı pulu ödəyə bilmədiyindən yaşadıqları evi S.Hacıbəyovanın adına keçirməyə məcbur olublar: “Hazırda 2 övladımla birlikdə kirayədə yaşayıram. Amma Nəsimi rayonu Sarabski küçəsi 41, mənzil 47 ünvanında qeydiyyatdayam. Keçmiş həyat yoldaşım xəbərim olmadan sələmçi qadından pul götürüb. Bunların heç birindən xəbərim yox idi. Yoldaşım Ədliyyə Nazirliyinin Penitensiar xidmətinin əməkdaşı olub. Həmin qadın da orada işləyib. Mütəmadi olaraq yoldaşım pulu neçə faizlə götürübsə ödəyib. Bu qadını sadəcə olaraq yoldaşımın iş yoldaşı kimi tanıyırdım. 2018-ci ilin dekabr ayında yoldaşımın ödəməsində problem olub. Sonra qadının himayədarı olan Nərimanov rayon məhkəməsinin sədri Tofiq Paşayev yoldaşımın iş yerinə zəng etməyə başladı. Dəfələrlə hədə-qorxuyla deyib ki, “Rövşənə bildirin Sitarənin pulunu qaytarsın, yoxsa onun başına oyun açacağıq, övladlarını Azərbaycandan köçürəcəyik”.
Şikayətçi xanım bildirir ki, ortada 40 min manat puldan söhbət gedir:
“Yoldaşıma 40 min veriblər, amma sonra şişirdərək məbləği 192 minə qaldırıblar. Guya bu rəqəmi öz faizlərinə görə belə ediblər. Bizim mənzilin mühafizəçiləri mənə və övladlarıma dəfələrlə dedilər ki, sizi güdürlər. Sitarə xanım mənə və yoldaşıma dəfələrlə deyib ki, “çeçenlərdən ibarət dəstəm var, kimin üstünə lazımdırsa, o dəstəni göndərirəm, dəstə yerindəcə hər şeyi həll edir”. Övladlarıma və mənə dəfələrlə hədə-qorxu gəliblər, hətta bizi öldürməklə qorxudublar. Sonda yoldaşım mənə dedi ki, polisə şikayət etməyin yeri yoxdur, çünki bu adamların çox güclü arxası var. Məhkəmə prosesi oldu, amma işə çox səthi baxıldı”.
Zərərçəkən məmur özbaşınalığına son qoyulmasını övladlarının haqqı olan evin geri alınmasını istəyir: “Evdən məcbur çıxıb övladlarımla kirayədə qalıram. Bu olanlardan sonra yoldaşımdan ayrıldım. Sitarəyə evi verəndən sonra deyirdi ki, “Rövşənin mənə başqa borcları da var”. Boşanmağımın əsas səbəbi bu oldu, daha dözə bilmədim.
Evi mənə atam verib. Bütün sənədlərin MTK-da kökü var. Mənzil atamın adına olub, sonra adıma keçib. Evimin geri qaytarılmasını istəyirəm. Nə mənim, nə də övladlarımın bu olanlarda günahı var. Sitarə pulu Rövşənə verib, gedib ondan da geri alsın.
250 manat maaşım nə ev puluna, nə övladlarımı böyüdüb onları oxutmağıma çatır. Baş verənlərdə heç bir xəbərim olmadığı halda övladlarımla kirayədə qalmışam”.
