Bəlkə də, dünyanın ən çətin, eyni zamanda şərəfli peşələrindən biri jurnalistikadır. Çünki jurnalist istənilən sahədən olan çoxsaylı insanlarla ünsiyyətdə olur. Hər biri ilə ayrı-ayrı dil tapmağa çalışır. Bu şərəfli peşənin nümayəndələri zaman-zaman kobud şəxslərin qeyri-etik ifadələrinə məruz qalır. Xüsusilə də mədəniyyət yazarları belə hallarla tez-tez rastlaşır. Maraqlıdır ki, həmin problemlər sənətçilərdən çox onların köməkçiləri, prodüserləri və menecerləri ilə yaşanır.
Bəs jurnalistə qarşı bu sayğısızlıq nədən qaynaqlanır?
Sualımıza cavab tapmaq məqsədilə tanınmış jurnalist Pərviz Hüseynlə əlaqə saxladıq. Həmkarımız “Sherg.az”a söylədi ki, istər prodüserlər, istər menecerlər, istərsə də köməkçilər birbaşa müğənnini təmsil edir:
“Onların etdiyi kiçik səhv sənətçinin imicinə böyük zərbə vurar. Onların heç kimlə kobud danışmağa haqqları yoxdur. Nəticədə bu kiminsə əməyini küçümsəmək mənasına gəlmir. Sadəcə olaraq, münasibətləri korlamaq düzgün deyil. İnsanın səhvi ola bilər, bu nöqsanı ona başa salmaq lazımdır. Jurnalistin müraciət formasında problem varsa, insanlar qarşılıqlı olaraq anlaşa bilərlər. Kiminsə kiməsə kobudluq etməyə hüququ yoxdur. Ola bilər ki, müğənnilərin köməkçiləri özlərini yuxarıdan aparsınlar, amma bu, düzgün deyil. Dediyim kimi bu, əsas müğənninin özünə zərərdir“.
