Ən məqsədəuyğun variant rayonların birləşdirilərək 14 iqtisadi rayon üzrə idarə olunmasıdır
Bu model artıq Xankəndi və Laçında tətbiq olunub və effektiv nəticələr verib
Yerli icra hakimiyyətlərində struktur islahatları gözlənilir. İslahatlar çərçivəsində illərlə mövcud olmuş, lakin müasir idarəetmə tələblərinə cavab verməyən bir sıra idarələrin fəaliyyətinə son qoyulacaq. Məlumata görə, funksionallığını itirmiş idarələr ləğv ediləcək. İslahatların məqsədi qərarların qəbulu prosesini sürətləndirmək, bürokratik əngəlləri aradan qaldırmaq və yerli icra hakimiyyətlərinin daha çevik və effektiv fəaliyyətini təmin etməkdir.
Bəzi idarələrin birləşdirilməsi, digərlərinin isə müasir tələblərə uyğun şəkildə yenidən formalaşdırılması nəzərdə tutulur. Hazırda məsələ ilə bağlı aidiyyəti qurumlarda texniki və hüquqi hazırlıq işləri aparılır. Rəsmi qərar və dəyişikliklərin payız aylarında təqdim ediləcəyi gözlənilir.
"Bələdiyyələrin fəaliyyətinin təbliği” İctimai Birliyinin sədri Vüqar Tofiqli Sherg.az-a bildirib ki, yerli icra hakimiyyəti orqanlarında struktur dəyişiklikləri artıq zərurətə çevrilib və bu istiqamətdə atılan addımlar gözlənilən idi. Onun sözlərinə görə, yerli icra hakimiyyətləri Prezidentin təyinatı ilə formalaşsa da, son illər faktiki səlahiyyətlərini əhəmiyyətli dərəcədə itiriblər:
“Hüquq-mühafizə orqanları istisna olmaqla, demək olar ki, bütün nazirlik və komitələr artıq regional idarəetmə sisteminə keçiblər. Lakin bu keçid vahid şəkildə deyil, pərakəndə formada həyata keçirildiyi üçün koordinasiya problemi yaranır. Nəticədə isə əziyyəti yenə də vətəndaş çəkir. Vətəndaş bir məsələni həll etmək üçün hansı quruma, hansı struktur bölməyə müraciət edəcəyini dəqiq bilmir. Nazirliklərin regional idarəetmə strukturlarının mövcudluğu şəraitində rayon icra hakimiyyəti başçılarının səlahiyyətləri demək olar ki, formallığa çevrilib. İcra başçıları proseslərə müdaxilə edə bilmir, çox zaman sadəcə vasitəçi rolunu oynayırlar. Bu baxımdan bəzi idarələrin ləğvi və ya birləşdirilməsi başadüşüləndir və təəccüblə qarşılanmamalıdır. Bu struktur islahatları kontekstində regional idarəetməyə keçid artıq qaçılmazdır. Ən məqsədəuyğun variant rayonların birləşdirilərək 14 iqtisadi rayon üzrə idarə olunmasıdır. Bu model artıq Xankəndi və Laçında tətbiq olunub və effektiv nəticələr verib. Prezidentin xüsusi nümayəndəlikləri bu bölgələrdə vətəndaşlarla əlaqədə, resursların idarə olunmasında və operativ qərarların qəbulunda müsbət təcrübə yaradıb. Düşünürəm ki, belə nümayəndəliklərin digər iqtisadi rayonlarda da yaradılması zəruridir. Daha irəli mərhələdə isə rayon icra hakimiyyətlərinin ləğvi və rayonların birbaşa bələdiyyələrin idarəetməsinə verilməsi məqsədəuyğun olar. Bu, büdcə xərclərinin optimallaşdırılmasına töhfə verə bilər. Ümumilikdə isə əsas məqsəd yerlərdə idarəetmənin sadələşdirilməsi, vətəndaş məmnunluğunun artırılması və inzibati baryerlərin aradan qaldırılmasıdır”.
