İşğalçı Ermənistan ölkəmizə təzminat ödəməlidir
Hazırda daha çox müzakirə edilən məsələlərdən biri Ermənistanın 30 il işğal altında saxladığı ərazilərimizə vurduğu ziyana görə Azərbaycana təzminat ödəməsidir. 30 ilə yaxın işğal altında qalan ərazilərimizdə infrastruktur, evlər, inzibati və sosial binalar Ermənistan tərəfindən tamamilə dağıdılıb və meşələr məhv edilib.
Dəymiş ziyanla bağlı fərqli rəqəmlər olsa da, ümumi zərər yüz milyard dollarlarla ölçülür. Birinci və İkinci Dünya müharibələrindən sonra dəymiş ziyana görə təzminatların ödənilməsi faktları qeydə alınıb. Körfəz müharibəsindən sonra İraqdan Küveytə vurduğu ziyanın ödənilməsini tələb edən BMT-nin 687 saylı qətnaməsi qəbul olunub. O zaman BMT Kompensasiya Komissiyası dəymiş ziyanın məbləğini 52.4 milyard dollar müəyyənləşdirib. Həmin vəsaitin 48.7 milyard dollarının ödənilməsinə nail olunub.
Millət vəkili Vüqar Bayramov deyib ki, Dünya Bankının metodologiyasına görə, 4 mühüm istiqamət üzrə ziyanın hesablanması həyata keçirilir. Bunlar əmlak və infrastruktura dəyən, iqtisadi nəticələrdən yaranan ziyan, eyni zamanda insanların həyatını itirməsi və məcburi köçkün həyatı yaşaması nəticəsində dəymiş ziyandır.
Suriya münaqişəsi zamanı iqtisadi ziyan 226 milyard dollar hesablanıb və bu da həmin ölkənin müharibədən əvvəlki illik Ümumi Daxili Məhsulundan 4 dəfə çoxdur. Bu baxımdan, dəymiş ziyanın məbləğinin hesablanması yekunlaşandan sonra Azərbaycan da beynəlxlaq məhkəməyə müraciət edərək, işğalçı Ermənistan tərəfindən təzminatın ödənilməsini tələb etmək hüququna malikdir.
Təzminatın ödənilməsi ilə bağlı beynəlxalq məhkəmə qərarı çıxarılandan və ya beynəlxalq qətnamələr qəbul olunduqdan sonra hətta kasıb ölkələr belə o vəsaiti tam və ya qismən ödəyiblər. Beynəlxalq hüquq məhz bunu tələb edir. Biz də bu addımı atmalı, Ermənistanın təzminat ödəməsinə nail olmalıyıq".
