“Rəqabət yaranacaq və vətəndaşların problemləri həllini daha tez tapacaq”
“Dövlət məmuru bürokratiyaya, özbaşınalığa yol verirsə, özəl icra məmur bunu etməyəcək”
Azərbaycanda özəl icra məmurları fəaliyyət göstərəcək.
Bu barədə Ədliyyə Nazirliyinin “Məhkəmə qərarlarının icrasının təşkili” mövzusunda keçirilən mətbuat konfransında Nazirliyin İcra baş idarəsinin rəis müavini Fərid Əfəndiyev məlumat verib.
O bildirib ki, bir çox ölkələrin qanunvericiliklərində bu məsələ geniş öyrənilib:
“Cənab nazirin müvafiq tapşırığı ilə bu istiqamətdə xüsusi işçi qrupu yaradılıb. Normativlərin, layihələrin hazırlanması davam edir. Demək olar ki, artıq razılaşdırma mərhələsindədir”.
Eyni zamanda yaradılan işçi qrupunun da üzvü olan F.Əfəndiyev özəl icra ilə dövlət icra məmurları arasında iş bölgüsünün də olacağını qeyd edib:
“Qanunda nəzərdə tutulub ki, müəyyən səlahiyyətlər özəl və dövlət icra məmurları arasında bölünəcək. Özəl icra məmurlarının fəaliyyətinə baxan palata olacaq. Onların sosial təminatı, tələbləri nəzərə alınacaq”.
Sözügedən təşəbbüs barədə “Sherg.az”a danışan Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni bunun zəruri olduğunu düşünür:
“Ədliyyə Nazirliyində ictimai komitənin üzvləri, icra baş idarəsinin nümayəndələri ilə birlikdə sözügedən məsələ haqqında müzakirələr getmişdi. Təşəbbüsün müasir dövrün tələblərinə uyğun üstünlükləri qeyd olunmuşdu.
Özəl icra məmurlarının fəaliyyətə başlaması, əlbəttə, çox yaxşı haldır. Belə bir alternativ xidmətin yaradılması vətəndaşların özəl icra məmuru kimi fəaliyyət göstərməsinə imkan yaradacaq.
Həm də dövlət məmurlarından narazı olanlar üçün alternativ variant yaranacaq. Nəticədə rəqabət meydana çıxacaq və vətəndaşların problemləri həllini daha tez tapacaq. Eyni zamanda dövlət məmuru bürokratiyaya, özbaşınalığa yol verirsə, özəl icra məmur bunu etməyəcək. Çünki gəliri birbaşa olaraq yerinə yetirdiyi işdən çıxır və hansısa məsuliyyətsizlik, qeyri-peşəkarlıq müştərini itirməklə nəticələnə bilər.
Ona görə də özəl icra məmurlarının fəaliyyətə başlamasını çox yüksək qiymətləndirirəm. Biz vətəndaşların problemlərinin həlli istiqamətində bundan sonra da əlimizdən gələni etməyə hazırıq”.
