Azərbaycan Prezidenti İlham Əliyev avqustun 30-da Azərbaycan-Türkiyə parlamentlərarası dostluq qrupunun rəhbəri Şamil Ayrımın başçılıq etdiyi Türkiyə Böyük Millət Məclisinin üzvlərindən ibarət nümayəndə heyətini qəbul edərkən deyib ki, artıq keçmişin qalığı olan ATƏT-in Minsk Qrupu və onunla əlaqədar olan təsisatlar tamamilə ləğv edilməlidir.
İlham Əliyev Minsk Qrupunun ləğv edilməməsi ilə bağlı Ermənistanın mövqeyinin heç bir halda başadüşülən olmadığını deyib:
“Çünki əgər münaqişə keçmişdə qalıbsa və Ermənistanın baş naziri Azərbaycanın ərazi bütövlüyünü dəstəklədiyini ifadə edirsə, onda keçmişin qalığı olan Minsk Qrupunun saxlanmasına nə ehtiyac var?!”.
Sual ortaya çıxır. Bütün bunlara baxmayaraq, Paşinyanın MQ ilə bağlı iddialarındakı məqsəd nədir? Ümumiyyətlə, ATƏT-in Minsk Qrupu niyə hələ də fəaliyyət göstərir?
Siyasi elmlər doktoru, professor, Sosial Tədqiqatlar Mərkəzinin sədr müavini Elşad Mirbəşiroğlu “Sherg.az”a açıqlamasında söyləyib ki, Paşinyan ATƏT-in Minsk Qrupundan dəstək gördüyü üçün onun ləğv olunmamasını istəyir:
''Çünki, ATƏT-in Minsk Qrupu hər zaman Ermənistana kömək edib. Keçmiş münaqişə vəziyyətində də MQ-nun fəaliyyəti Ermənistanın xeyrinə həll olunmasına yönəlib. Ermənistana zaman ona görə lazım idi ki, bir müddət sonra, vaxtilə işğal altında olan torpaqları anneksiya etsin. Həmçinin, günümüzdə Ermənistanın ATƏT-in Minsk Qrupunun fəaliyyətinin davam etdirilməsində israrı Qərbin istəklərinə uyğun olaraq münaqişə vəziyyətinin hələ də davam etdiyi təəssüratını formalaşdırmağa çalışmasıdır. Çünki Qərb münaqişə vəziyyətini Cənubi Qafqaz regionunda aradan qalxma faktını qəbul etmək istəmir. Ermənistan aldığı təlimatlar əsasında Minsk Qrupunun fəaliyyətinin davam etdirilməsinə çalışır. Ona görə ki, münaqişə vəziyyətinin aradan qalxması Qərbin Cənubi Qafqaz regionları ilə bağlı təhlükəli planlarını alt-üst etmiş olur. Bu səbəbdən Qərb hər vasitə ilə regionda gərginlik elementlərinin mövcud olmasına çalışır. Ümumiyyətlə Qərb Ermənistanın dəstəyi ilə orada varlığını təmin edib. Azərbaycan prezidenti tələb edir ki, Ermənistan həm konstitusiyasında dəyişiklik etməlidir, həm də ATƏT MQ-nun ləğvi üçün birgə müraciətə razı olmalıdır. Paşinyan isə bütün bunları etmir. Çünki hər iki element Ermənista imkan yaradacaq ki, Azərbaycana qarşı revanş etsin".
