Aprelin 6-sı axşam saatlarından aprelin 7-si saat 04:30-dək Ermənistan silahlı qüvvələrinin bölmələri Gorus, Qarakilsə, Basarkeçər, Keşişkənd, Tovuzqala və Çəmbərək rayonları istiqamətlərində yerləşən mövqelərindən Azərbaycan Ordusunun mövqelərini atıcı silahlardan fasilələrlə intensiv atəşə tutub.
Bu barədə Müdafiə Nazirliyi məlumat yayıb.
"Bölmələrimiz tərəfindən qeyd olunan istiqamətlərdə adekvat cavab tədbirləri görülüb", MN-in məlumatında deyilir.
Politoloq Tural İsmayılov "Sherg.az"a deyib ki, bu gün Ermənistana ağır hücum silahları verən Fransa və ümumilikdə bütün beynəlxalq güc aktorları Cənubi Qafqaz regionunda sabitliyin əleyhinə fəaliyyət göstərirlər:
"Azərbaycanla Ermənistan arasında əldə edilə biləcək sülh sazişindən bir çox dövlətlər ciddi formada narahatlıq keçirirlər. Buna görə də bütün vasitələrdən istifadə edərək Ermənistanı Azərbaycan əleyhinə təxribatlara və provokasiyalara cəlb edirlər. Son dövrdə İrəvanın sərhəddə təxribatlar törətməsi də onun növbəti müharibə ssenarisinə hazırlaşdığını göstərir. Bütün təhlillər onu söyləməyə əsas verir ki, Ermənistanın aprel ayında Azərbaycana qarşı yeni eskalasiyalar həyata keçirə bilər. Bakı və İrəvan arasında sülh müqaviləsinin reallaşmasını istəməyən qüvvələr var. Onlar ciddi-cəhdlə çalışırlar ki, Cənubi Qafqaz bölgəsində gərginlik olsun. Təəssüf ki, Ermənistanın indiki hökuməti də əvvəlki revanşist hakimiyyətdən fərqli davrana bilmir".
Politoloq qeyd edib ki, Ermənistan özü də başa düşür ki, onun bir dövlət kimi iqtisadi-siyasi və hər mənada mövcudluğu yalnız Azərbaycanla normal münasibətlər qurmaqdan asılıdır:
"Lakin İrəvan bütün addımları ilə barışıq, sülh, etimad mühitindən uzaqlığını və dövlətlərarası əlaqələr sisteminin formalaşmasında maraqlı olmadığını göstərir. Hər bir halda Ermənistanın həm indiki hakimiyyəti, həm də onun arxasında dayanan havadarlar bu ölkəni Azərbaycan əleyhinə qızışdırmağa və yeni təxribatlar törətməyə məcbur edir".
