“Gürcüstanı Avropa Şurası Parlament Assambleyasında təmsil edən nümayəndə heyətinin üzvləri tam tərkibdə “erməni terrorçuların qaytarılması" formatında erməni deputatları tərəfindən təqdim olunan qətnamə layihəsinə səs verməklə birbaşa rəsmi Gürcüstanın mövqeyini ifadə etmişlər”.
Bu sözləri millət vəkili Fazil Mustafa deyib. Parlamentari qeyd edib ki, burada məsələyə sadəcə bir qrup deputatın fərdi mövqeyi kimi yanaşmaq doğru sayılmaz:
“Buna bir həftə öncə Gürcüstan Prezidentinin erməni qəlbdaşının imzaladığı sənədin altında çəkdiyi Ağrı Dağının rəsmini fəxrlə mediada paylaşması kimi səviyyəsiz davranışının davamı olaraq baxmaq lazımdır”.
Politoloq, hüquqşünas Fərhad Mehdiyev Gürcüstanın sözügedən addımı barədə fikirlərini “Sherg.az”la bölüşdü:
“Ermənistan prezidenti Armen Sarkisyanın bir müddət əvvəl Gürcüstana səfəri, çox güman ki, bununla bağlı idi. Yəni məsələ əvvəlcədən danışılmışdı. Çünki Gürcüstan da Paşinyanın seçkilərdə qalib gələrək hakimiyyətini qorumasını istəyir.
Rəsmi Tbilisidə terrorçuların geri qaytarılmasının Paşinyanın gələcək siyasi karyerası üçün böyük avantaj olduğunu yaxşı bilirlər. Onu da deyim ki, Gürcüstanın sözügedən davranışını beynəlxalq hüquq baxımından qiymətləndirmək düzgün omaz.
Əsas məsələ Azərbaycanın terrorçuları geri verməməyinin beynəlxalq hüququn tələbləri ilə nə qədər üst-üstə düşməsidir”.
