Rusiya ilə Ermənistan arasında böhran dərindir
Hamıya bəllidir ki, Paşinyan hakimiyyəti ilk gündən etibarən Kremllə yollarını ayırıb
Ermənistan XİN rəhbəri Ararat Mirzoyan deyib ki, Rusiya ilə Ermənistan arasındakı münasibətləri böhran adlandırmaq baş verənlərin həddindən artıq çox şişirdilməsidir: “Biz rusiyalı həmkarlarımızla daim əlaqə saxlayırıq. Zəngin iş gündəliyimizə daxil olan, həm razılaşdırılmış, həmçinin razılıq əldə olunmayan bütün məsələləri müzakirə edirik". Nazir onu da əlavə edib ki, bəzi məsələlərdə, o cümlədən Kollektiv Təhlükəsizlik Müqaviləsi Təşkilatının (KTMT) fəaliyyəti və siyasi qiymətləndirmə ilə bağlı fikir ayrılıqları var. Lakin onlar ümumi müstəvidə müzakirəyə açıqdır.
Mirzoyanın açıqlamasını "Şərq"ə dəyərləndirən politoloq Turab Rzayev deyib ki, bunlar diplomatik səviyyədə verilmiş rəsmi açıqlamalardır. Analitik vurğulayıb ki, əsas məsələ bir ölkənin xarici işlər nazirinin digər bir dövlətlə "aralarında ziddiyyət yoxdur" açıqlamasının hansı zərurətdən irəli gəlməsidir:
"Buna aydınlıq gətirilməlidir. Əgər nazir belə bir açıqlama vermək məcburiyyəti duyubsa, deməli, əslində belə problem var. Görünür, nazir də mövcud problemi hansısa formada yumşaltmaq istəyib. Hamıya bəllidir ki, Paşinyan hakimiyyəti ilk gündən etibarən Rusiya ilə yollarını ayırıb. Çünki erməni baş nazir Qərbin liberal çevrəsinin dəstəklədiyi, maliyyələşdirdiyi "məxməri inqilab"la hakimiyyətə gəlib. Moskva, şəxsən Putin bu cür inqilablara, o cümlədən də Paşinyanın şəxsinə nifrət edir. Paşinyan Ermənistanda vəzifə başına gələndən Kremldən uzaqlaşmaq siyasətini güdür. 44 günlük müharibə və ondan sonrakı proseslər Ermənistanın gündəmini dəyişdirmişdi. Ancaq son aylarda İrəvan hökuməti yenidən anti-Rusiya siyasətinə davam etməyi qərarlaşdırıb. Ölkədə Rusiya əleyhinə mitinqlər təşkil olunur, Gümrüdə etirazlar baş verir, rus bazasının çıxarılması tələb olunur, KTMT tənqid olunur, bölgəyə beynəlxalq sülhməramlıların gətirilməsi təklif edilir və s. Paşinyan hakimiyyəti və erməni əhalisi açıq şəkildə Rusiyadan uzaqlaşmağa çalışır. Bu, Paşinyanı hakimiyyətə gətirənlərin təlimatı olmaqla yanaşı, görünür, həm də erməni əhalisinin istəyidir. Problem isə ondadır ki, Rusiyanın Ermənistandakı mövqeyi çox güclüdür. Ermənistanda rusların iki hərbi bazası yerləşir. Ölkənin hava və quru sərhədləri rus hərbçilər tərəfindən qorunur. Paşinyan xaricə səfər edərkən belə rus sərhədçilərinin nəzarətindən keçir. İrəvanın Rusiyadan asılılığını birdən-birə ortadan qaldırmaq çox çətindir".
