Bütün çağırışlarımıza baxmayaraq, Ermənistan itkin düşmüş şəxslərimizin yerləri barədə məlumat vermir və beynəlxalq təşkilatlar da bu ədalətsizliyə göz yumurlar.
Bunu APA-ya açıqlamasında I Qarabağ müharibəsi zamanı itkin düşmüş leytenant Canıyev Səxavət Xanış oğlunun həyat yoldaşı Reyhan Canıyeva deyib.
O bildirib ki, Ermənistan itkin düşənlərin ailələrinin qarşısında cavab verməli, itkinlərin taleyinə aydınlıq gətirməlidir:
"Yoldaşım 1994-cü ildə Azərbaycanın ərazi bütövlüyü uğrunda müdafiəyə qalxıb. Həmin il yanvarın 26-da Füzulinin Əbdürrəhmanlı kəndində itkin düşüb. Ulu öndər Heydər Əliyevin xaricə göndərdiyi ilk tələbə qrupunun tərkibində Rostova gedərək orada ali təhsil almış gənclərdən idi. Müharibə dövründə taqım komandiri kimi cəbhədə fəaliyyət göatərib, dəfələrlə "Ordu" qəzetində məqalələri çap olunub.
Dəfələrlə müraciət etsək də, Ermənistan kütləvi məzarlıqların yerini açıqlamır. Mən də öz növbəmdə Beynəlxalq ictimaiyyətə üzümü tutaraq bizim haqq səsimizə səs vermələrini istəyirəm.
Bu gün işğaldan azad edilmiş ərazilərimizdə itkin düşən şəxslərimizin basdırıldığı yerlərin axtarılmasında ən böyük problemlərdən biri də mina məsələsidir. Lakin bütün çağırışlarımıza baxmayaraq, Ermənistan nə itkin düşmüş şəxslərimizin yerləri barədə məlumat verir, nə də ki minaların basdırıldığı yerlərin xəritələrini təqdim edir. Onların bu quldurluğuna isə təəssüf ki, beynəlxalq ictimaiyyət, əsas aparıcı təşkilatlar səsini çıxarmırlar".
