Ekspert bu sahədə problem olacağını düşünmür
Azərbaycanda lotereya və idman mərc oyunlarının nağdsız dövriyyəyə cəlb edilməsi gündəmə gəlib. “Azərbaycan Banklar Assosiasiyası” İctimai Birliyinin xəbərinə görə, bu məsələ qurumun “Ödəniş sistemləri və rəqəmsal bankçılıq üzrə Ekspert Qrupu”nun növbəti görüşündə müzakirə edilib. Görüş rəqəmsal ödənişlərdə təhlükəsizlik səviyyəsinin yüksəldilməsi, ekosistemin əhatə dairəsinin genişləndirilməsi və effektiv tarif siyasətinin tətbiqi mövzusunda keçirilib.
Görüşdə fintexlərlə əməkdaşlıq istiqamətləri, qanunsuz lotereya oyunlarına qarşı birgə mübarizənin davam etdirilməsi, lotereya və idman mərc oyunlarının nağdsız dövriyyəyə cəlb edilməsi və Ani Ödənişlər Sistemi üzərindən yeni ödəniş əməliyyatlarının emalı müzakirə olunub. Həmçinin, Banklararası Kart Mərkəzinin fəaliyyəti üzrə mövcud Kollektiv Sazişin təkmilləşdirilməsi istiqamətində atılacaq addımlar, habelə bir qrup fəaliyyət növləri üzrə effektiv interçeync xidmət haqlarının tətbiq edilməsi ətrafında qarşılıqlı fikir mübadiləsi aparılıb.
İqtisadçı Fuad İbrahimov “Sherg.az"-a açıqlamasında bildirdi ki, adıçəkilən birliyin ekspert qrupunun növbəti görüşü lotereya və idman-mərc oyunları sahəsində təkmilləşmə aparılması, sürətli xidmətin elastikliyinin artırılması məqsədi daşıyır:
- Azərbaycanda bu sektorda problem yoxdur. Bu sahədə, əslində, biz xeyli irəliləmişik. Problem 90-cı illərdə var idi. O zaman, xatırlayırsınızsa, harda gəldi, hətta binaların önündə quraşdırılan çadırlarda da mərc oyunları təşkil olunurdu, bunu təşkil edənlər öz maraq dairələrinə uyğun oyunları dövrəyə daxil edirdilər. Loto oyunları zamanı nömrələri qışqıra-qışqıra elan ediridlər və sair. Amma sonra ilk növbədə “Azərlotereya”, onun ardınca da “Topaz” müasir mərc-idman oyunları təşkil edildi. “Azərlotereya” da, “Topaz” da çoxdandır elektron formatda ödəniş layihələri həyata keçirir və getdikcə daha da genişləndirirlər. Artıq birjalarda da, istər əmtəə birjaları, istərsə də dönərli valyuta birjalarında rahat iştirak təmin edilib. İnsanlar evində rajatca əyləşdiyi yerdə platformalar üzərindən ödəniş etməklə istədiyi oyunu seçib iştirak edə bilir. Hansı oyunda hansı əmsaldır, nə qədər ödəniş nə qədər qazanc gətirir, bunlar barədə rahatlıqla məlumat əldə edirlər. Bu sahədə ciddi çatışmazlıq yoxdur. Hesab edirəm ki, keçirilən görüşlər, aparılan müzakirələr bu sahədə təkmilləşmə aparılması, sürətli xidmətin elastikliyini artırmağa yönəlib.
