Tural Səfərov: "Artıq məni şəxsi ambisiyalarına görə qanunsuz şəkildə həbs etdirənlər tarixin zibilliyinə atılıb"
"2021-ci ilin iyun ayında Vasif Talıbovun tapşırığı ilə Naxçıvanda qanunsuz şəkildə həbs edilmişdim. Naxçıvan Şəhər Məhkəməsinin hökmü ilə 4 ay müddətinə azadlıqdan məhrum olunmuşdum". Bu sözləri tanınmış naxçıvanlı jurnalist, "TNS" İnformasiya Agentliyinin rəhbəri Tural Səfərov deyib. Jurnalist bildirib ki, həbs olunmasının bəhanəsi Naxçıvan Beynəlxalq Hava Limanı barədə yazdığı tənqidi status olub:
"Dəfələrlə qeyd etdiyim kimi, mənim həbsimin çox ciddi siyasi səbəbləri var idi. Bir ay həbsdə qaldıqdan sonra Azərbaycanın müvafiq dövlət orqanlarının müdaxiləsi ilə şərti azadlığa buraxılmışdım.
Həmin ilin dekabr ayında amnistiya tətbiq edilmiş və məhkumluğum götürülmüşdü. Mən cinayətkar deyildim və bu qərarla heç cür razılaşa bilməzdim. Ona görə də mənə bəraət verilməsi xahişi ilə Azərbaycan Respublikasının Ali Məhkəməsinə kassasiya şikayəti vermişdik. Bu gün məhkəmə iclası keçirildi. Azərbaycan Respublikasının Ali Məhkəməsi Naxçıvan Muxtar Respublikası Ali Məhkəməsinin qərarını qanunsuz hesab edərək ləğv etdi. İş baxılması və bəraət verilməsi üçün yenidən Naxçıvan Muxtar Respublikasının Ali Məhkəməsinə qaytarıldı. Artıq məni şəxsi ambisiyalarına görə qanunsuz şəkildə həbs etdirənlər tarixin zibilliyinə atılıb. Ona görə də Naxçıvan Ali Məhkəməsində bəraət alacağıma inanıram".
T.Səfərov Azərbaycanda ədalətli məhkəmə sisteminin qurulması istiqamətində apardığı islahatlara, haqlının və ədalətin yanında olduğuna görə Azərbaycan Prezidenti İlham Əliyevə minnətdarlığını bildirib:
"Bu müddətdə haqlı mövqeyimi dəstəkləyən, yanımda olan ağsaqqallara, dostlara, dəyərli millət vəkillərinə, partiya sədrlərinə, siyasi və ictimai xadimlərə, jurnalist həmkarlarıma təşəkkürümü bildirirəm. Biz birlikdə güclüyük. Qoy hər zaman ədalət zəfər çalsın!".
