“Şərqi Avropada real savaş təhlükəsi var. Amma Rusiya buna cəsarət etməyəcək”
“Çünki Qərb dövlətlərinin Rusiyanın qarşısında duracağı bəllidir. Onlar Ukraynaya hərbi, maliyyə yardımlarını etməyə davam edirlər”
“Ukraynaya 1,5 milyard dollardan çox hərbi, maliyyə yardımı olunub. Böyük Britaniya 2 milyarddan çox yardım söz verib. Bunun 1 milyardı hərbi texnika yardımıdır”
“Əsas məqsəd silahlanmada, təlimdə, iqtisadiyyatda Rusiya ilə Ukrayna arasındakı fərqi aradan qaldırmaqdır”
ABŞ vətəndaşlarını Ukraynanı tərk etməyə çağırıb. Ölkənin Ukraynadakı səfirliyi bu barədə bəyanat yayıb. Qeyd olunub ki, Ukraynada təhlükəsizlik vəziyyətinin qəfil pisləşməsi riski var: “ABŞ vətəndaşlarını Ukraynanı dərhal tərk etməyə çağırır”. ABŞ-nin ardınca Britaniyadan da Ukrayna-Rusiya gərginliyinə reaksiya gəldi. Böyük Britaniyanın müdafiə naziri Ben Uolles bu barədə açıqlama yayıb. O bildirib ki, qərb ölkələrinin Rusiya rəhbərliyi ilə apardığı danışıqlara baxmayaraq, Ukrayna sərhədləri yaxınlığında vəziyyət getdikcə daha da gərginləşir:
“Rusiya hələ də Ukrayna sərhədlərində hərbi batalyon qruplarının sayını artırır. Həmçinin hərbi kontingentini Belarusa göndərir və orada qoşun yerləşdirib”.
Ben Uollesin sözlərinə görə, Britaniya gərginliyin azaldılması üçün mümkün hər şeyi etməyə hazırdır.
Qərbin münaqişə ilə bağlı açıqlamalarındakı gizli "kod"ları "Sherg.az"a şərh edən politoloq Turab Rzayev bildirib ki, qərblilər Rusiyada yeni Əfqanıstan yaratmaq istəyirlər:
“Rusiyanın Ukrayna sərhədləri yaxınlığına qısa müddətdə 30 eşalondan çox hərbi texnika göndərdiyini müşahidə etdik. Bunun hərbi təlim üçün nəzərdə tutulmadığı aydın şəkildə görünür. Həmçinin Belarus-Ukrayna sərhədinə minlərlə əsgər yığılıb. Bunlar Rusiya-Ukrayna arasındakı gərginliyi daha da artırır. Qərb dövlətlərinin isə münaqişə ilə bağlı açıqlamalarında iki məqam var. Onlar həm vətəndaşlarına, həm də dünyaya Rusiyanın işğalçı, aqressor olduğu mesajını ötürürlər. Nəticədə Moskvaya qarşı qlobal təzyiqin formalaşdırılması nəzərdə tutulub.
İkinci məqam isə qərblilərin Rusiyanı müharibəyə təşviq etməsidir. Bununla da Moskvanı zəiflətmək, maliyyəsini, hərbi resurslarını bitirmək niyyətindədirlər. Bunlar hamısı Moskvanı tələyə çəkmək üçün atılan addımlardır”.
Politoloq müharibənin baş tutacağı təqdirdə Ukraynaya yardımların daha da artırılacağını qeyd edib:
“Şərqi Avropada real savaş təhlükəsi var. Amma Rusiya buna cəsarət etməyəcək. Çünki Qərb dövlətlərinin Rusiyanın qarşısında duracağı bəllidir. Onlar Ukraynaya hərbi, maliyyə yardımlarını etməyə davam edirlər. Ukraynaya 1,5 milyard dollardan çox hərbi, maliyyə yardımı olunub. Böyük Britaniya 2 milyarddan çox yardım söz verib. Bunun 1 milyardı hərbi texnika yardımıdır. Əsas məqsəd silahlanmada, təlimdə, iqtisadiyyatda Rusiya ilə Ukrayna arasındakı fərqi aradan qaldırmaqdır. Müharibə baş verərsə, NATO-nun birbaşa Rusiya ilə döyüşəcəyi mümkünsüz görünür”.
Xanlar ƏLİBƏY
