Sosial şəbəkələrdə erməni separatçıların Azərbaycanın Qarabağ bölgəsində, Rusiya sülhməramlı kontingentinin müvəqqəti nəzarətində olan ərazisində qanunsuz hərbi daşımalarını əks etdirən görüntülər yayılıb.
Kadrlardan bəlli olur ki, rus sülhməramlılar qanunsuz hərbi daşımaları gerçəkləşdirən erməni hərbi birləşmələrini müşayiət edirlər.
Sözügedən məsələni şərh edən hərbi-ekspert Ədalət Verdiyev "Sherg.az"a açıqlamasında bildirib ki, aprelin 23-dən sonra paylaşılan görüntülər rusların Azərbaycan ərazilərində erməni silahlı dəstələri ilə birgə daşınmalar həyata keçirməsi Ermənistanla əlaqəli deyil:
"Bu daşınmalar Xankəndi-Xəlfəli-Kərkicahan yolu ilə həyata keçrilir. Bu, birmənalı birgə bəyanatın şərtlərinə ziddir. Həmin silahlıları 31 ay əvvəl ərazidən çıxarmalı olan Rusiya kontingenti bu gün onlara kuryerlik edirsə, deməli, onların qarşısında hansısa günahları var. Onlar bu günahı yumaq üçün düşmən tərəfə nökərlik etməkdən çəkinmirlər. Şimal qonşumuz öz fəaliyyətləri ilə bir daha nümayiş etdirir ki, Qarabağda daha uzun müddət qalmaq üçün erməni silahlılarını dəstəkləmək yolunu seçirlər. Bu, Azərbaycanın dövlət maraqlarına tamamilə ziddir. Bəyanatda nəzərdə tutulmayan silahların, ağır texnikaların, radiolokasiya stansiyaların və radioelektron mübarizə komplekslərin Qarabağda olmasını, ermənilərin onlardan aktiv istifadəsini nəzərə alsaq, Azərbaycanın silahlıları ərazimizdən təmizləməkdən başqa yolu qalmır. Ümid edirəm ki, Azərbaycan tərəfi yaxın gələcəkdə təmizləmə əməliyyatlarına başlayacaq".
Şahanə Tağızadə
