Əsas məqsədi dünyada 300 milyondan çox olan türk kökənli insanları bir araya gətirməkdir
"Türk Dövlətləri Təşkilatının (TDT) mülki müdafiə mexanizminin yaradılması mərhələsindəyik". Bunu Türkiyənin daxili işlər naziri Süleyman Soylu TDT Təbii Fəlakət və Fövqəladə Halların İdarəedilməsi üzrə Nazirlərin Zirvə görüşündə deyib. O bildirib ki, bu gün bu istiqamətdə ilk addımlar atılır: "Zəlzələlər güclü və dağıdıcıdır. Amma inanırıq ki, bizim qardaşlığımız daha güclüdür”.
Siyasi elmlər doktoru, professor Cümşüd Nuriyev "Şərq"ə deyib ki, Türk Dövlətləri Təşkilatının "doğum şəhadətnaməsi" 2009-cu ilin oktyabr ayında, Azərbaycanın beş min illik qədim tarixə malik Naxçıvan diyarında yazılıb. Professor vurğulayıb ki, bu ideyanın müəllifləri - Türkiyə lideri Rəcəb Tayyib Ərdoğan və Azərbaycan Prezidenti İlham Əliyevdir:
"Layihə çox ağıllı, uğurlu və uzaqgörən proyektdir. Əsas məqsədi dünyada 300 milyondan çox olan türk kökənli insanları bir araya gətirmək və gələcək talelərini birlikdə müəyyən etməkdir. Türk Dövlətləri Təşkilatı möhkəmlənənə və beynəlxalq təşkilata çevrilənədək açıq siyasət yürütməkdi. Regional qurum sayılsa da, beynəlxalq əməkdaşlıq və türk mənşəli xalqların inteqrasiyasi sahəsində böyük rol oynayır. Türk Dövlətləri Təşkilatı daha da təşkilatlanmaq, böyümək və güclənmək üçün yeni layihələr reallaşdırır. Onlardan biri də mülki müdafiə sahəsində birgə əməkdaşlıq mexanizmi yaratmaqdır. Mülki müdafiə sahəsində birgə əməkdaşlıq önəmlidir. Türkün birliyi zəlzələdən güclüdür. Türkiyənin müdafiə naziri Hulusi Akar bir müddət öncə Azərbaycan və Türkiyənin vahid ordu məsələsini də gündəmə gətirmişdi. Adını necə istəyirlər qoysunlar, kimisi Turan Ordusu deyir, başqaları Türk Ordusu adlandırır, fərq etməz. Türk Dövlətləri Təşkilatının özünümüdafiə mexanizmi yaratması vacibdir. Artıq bu məsələ də gündəmdədir. Hər bir dövlətin prioriteti ölkənin və xalqın milli təhlükəsizliyini təmin etməkdir".
C.Nuriyev söyləyib ki, türk xalqlarının yaşadığı bölgələrə dikilən yad gözlər çoxdur: "Ortaq müdafiə mexanizmlərinin yaradılması bütün təşkilat üzvlərinin təhlükəsizliyinə təminatdır. Daxili təhlükələrlə türk respublikaları özləri təkbaşına da mübarizə aparırlar.
Azərbaycan 44 günlük Vətən savaşı ilə digər türk dövlətlərinə də stimul, motivasiya verdi. Amma xarici təhlükəsizliklə birgə mübarizə çox vacibdir. Türkiyə və Azərbaycanın yerləşdiyi bölgə ən çox münaqişə və qarşıdurma yaşanan məkanlardandır. Ətrafımızda bizə düşmən güclər çoxdur. Ona görə də türk dövlətləri birmənalı şəkildə siyasi-iqtisadi və hərbi sahələrdə bir yerdə olmalıdırlar. Siyasi və iqtisadi sahələrdə xeyli yol qət edilib və ciddi çatışmazlıq yoxdur. Lakin hərbi sahədə daha sıx əməkdaşlığa, sazişlərə ehtiyac var. Bu proseslərdə lokomotiv statusa malik qardaş Türkiyədir. Təbii ki, Azərbaycan da mühüm rola sahibdir. TDT-nin işləmə mexanizmini mükəmməl hala gətirmək üçün davamlı görüşlər və müzakirələr şərtdir".
