Bazar günü İranın onlarla şəhərində keçirilən kütləvi aksiyalarla yanaşı, universitetlərdə də etirazlar baş tutub. Tələbələrin geniş etiraz aksiyalarından sonra oktyabrın 2-də İranın nüfuzlu Şərif Texnologiya Universitetində dərslər dayandırılıb. Növbəti bildirişə qədər tələbələrin universitetə girişinə qadağa qoyulub. Şərif Texnologiya Universitetində təşkil edilən aksiyaya hökumət qüvvələrinin sərt müdaxiləsi olub və tələbələrə qarşı gözyaşardıcı qazdan, rezin dəyənəklərdən istifadə edilib. Universitet mühasirəyə alınıb. İranın elm naziri Məhəmmədəli Zülfi Gül hadisə yerinə gəlib və aranı sakitləşdirməyə çalışsa da, nəticə əldə olunmayıb. Çox sayda tələbə yaralanıb və həbs edilib.
Ardınca üç oktaybrda Kirmanşah Baytarlıq İnstitutunun və Tehran Azad Tibb Universitetinin tələbələri də oturaq aksiyaya başlayıblar. Onlar “Qeyrətli müəllimlər, dəstək verin, dəstək verin” ,“Tələbə ölər, alçalmağı qəbul etməz” şüarlarlarını səsləndiriblər.
Savalan Araşdırmalar Mərkəzinin rəhbəri, siyasi şərhçi, Güney Azərbaycan Milli Azadlıq Cəbhəsinin İdarə Heyətinin Üzvü Sadiq İsabəyli İrandakı mövcud vəziyyəti “Sherg.az”a dəyərləndirərkən bildirib ki, artıq burdakı kütləvi etirazlar ikinci həftəyə qədər qoyub və etirazların əhatə dairəsi getdikcə daha da genişlənir:
“İndi artıq tələbələr və orta məktəb şagirdləri də aksiyalarda iştirak edirlər. Əvvəlcə Təbriz Universitetinində tələbələr etirazlara qoşuldular. Polis onların universitet qapısından küçələrə axın etməsinin qarşısını almağa çalışsa da, bacarmadı. Aksiyalarda səsləndirən şüarlara nəzər salaq:
"Diktatora ölüm olsun", " Xomeyniyə ölüm olsun", "İslam Cümhuriyyətini istəmirik". Bu şüarlar artıq mövcud rejimin ideoloji və siyasi mahiyyətini itirdiyini göstərdi. Təbii ki, buna çox ciddi və sərt müdaxilə edildi. Polislər axşama yaxın Təbriz universitetini tamamilə mühasirəyə aldılar. Bizə verilən məlumata görə, Təbrizdə həbs edilən yüzlərlə tələbədən xəbər yoxdur.
Onaların hara aparıldığı hələ də məlum deyil. Bundan sonra ayrı-ayrı şəhərlərdəki universitetlərin tələbələri də etirazlara qoşuldular. Bu etirazlara Tehranın Şərif Texnologiya Universitetində oxuyan tələbələr da qatıldı. Nəticədə həmin universitet qapadıldı. Tələblərlə təhsil nazirinin görüşü oldu.
Nazir onları aksiyalara qoşulduqları üçün təhdid etdi. Bu da ayrı bir etiraza səbəb olub. Kütlə gecə vaxtı nazirliyin önünə axışdı. Elə həmin gün axşam özlərinə millət vəkili deyən insanlar parlamentdə vətəndaşlara qarşı savaş elan etdilər. Onları təhdid edib, zorakı polisə təşəkkür etdilər.
Dedilər ki, bu etrizaçıları təmizləmək lazımdır. Bu indiki rejimin getdikcə aqressiv və basqınçı polisin gücünü ortaya qoymaq istədiyi göstərir. Amma artıq bunun xeyri olmayacaq. Çünki etirazlar daha da genişlənib, bütün bölgələrə yayılıb. Belə bir ağır vəziyyətin ortaya çıxmasında əsas səbəbkar rejimin özüdür. Vətəndaşlar belə bir hakimiyyəti istəmirlər”.
S.İsabəylinin fikrincə, İrandakı hakimiyyət indiki yanaşması ilə ölkədəki etirazların qarşısını heç cür ala bilməyəcək. Əksinə onların daha da genişlənməsinə səbəb olacaq:
“Rejim açıq-aydın öz vətəndaşlarına savaş elan edib. Sözsüz ki, 43 illik bu siyasi ideoloji hakimiyyətin apardığı siyasət onu uçuruma yuvarladacaq. Vətəndaşlar artıq təhdid və basqılarla yaşamaq istəmirlər. Mövcud rejim ya vətəndaşların bütün istəklərini qəbul etməli, ya da geri çəkilməlidir. İranda yeni nəsil bu siyasi rejimin mahiyyətcə mövcudluğunu qəbul etmir. Hələ burda qeyri-fars millətlərinə qarşı aparılan ayrı - seçkilik onlar üçün, ümümiyyətlə, qəbul edilməzdir.
Bütün bunları nəzərə alsaq, deyə bilərik ki, İrandakı etirazlar irəliləyən günlərdə daha da kütləviləşəcək. Nəticə isə gedişatdan asılıdı”.
