“Azərbaycan və Özbəkistanın Müdafiə Nazirliyi arasında 2023-cü il üçün ikitərəfli əməkdaşlıq Planı”na əsasən Daşkənd vilayətinin Çirçik poliqonunda "UZAZ-2023" kompüter dəstəkli taktiki komanda-qərargah təlimi başlayıb.
Bu təlimlər barədə "Sherg.az"a danışan hərbi-ekspert Alparslan İmamqulu bildirib ki, indi dünyanın əksər dövləti bir araya gəlib ittifaqlar yaradır:
"Türk dövlətləri arasında birgə təlimlərin keçirilməsi həm təşkilat adına münasibətlərin möhkəmlənməsi, həm də gələcəkdə yeni ordunun qurulması istiqamətində addımların atılması kimi qiymətləndirilə bilər. Buna NATO və onun ortaq təşkil etdiyi ordunu nümunə göstərmək olar. Bu coğrafiyada enerji xətlərinin daha sıx keçdiyi ölkələrin bir araya gəlməsi, birgə ordu təşkil etməsi və gələcəkdə ortaq pul vahidinin olması münasibətlərin möhkəmləndirilməsi baxımından önəmlidir".
Ekspert onu da qeyd edib ki, istənilən dövlətlə birgə hərbi təlimlər keçirilməsi ordumuzun təcrübəsinin və qabiliyyətinin günü-gündən daha da artmasına gətirib çıxaracaq:
"Amma bunun türk kökündən bir dövlətlə baş tutmasının başqa bir mənası var".
Şahanə Tağızadə
