“Həm rəsmi Ankara , həm də rəsmi Paris NATO ölkəsidir”
“Onların arasındakı gərginlik ABŞ-dakı yeni iqtidar üçün arzuolunmazdır”
“Məncə, Türkiyə ilə Fransa arasındakı loyal dialoqlarda rəsmi Vaşinqtonun da xidmətləri var”
Türkiyə Prezidenti Rəcəb Tayyib Ərdoğan ilə Fransa Prezidenti Emmanuel Makron arasında telefon danışığı olub. Liderlər beş aylıq fasilədən sonra Türkiyə-Fransa münasibətlərini, mövcud problemləri müzakirə ediblər. Bildirilir ki, Prezident Rəcəb Tayyib Ərdoğan Türkiyə-Fransa əməkdaşlığının çox ciddi potensiala malik olduğunu dilə gətirib.
Onun, fransalı həmkarına “Əziz qardaşım” xitabı isə xüsusi diqqət çəkib. Sözügedən telefon danışığı tərəflər arasındakı “buzların əridiyi”nin göstəricisidir. Siyasətdə təsadüfi addımların olmadığını nəzərə alsaq, deməli, “təbəssümlər” nəyəsə hesanlanıb.
Sosial Tədqiqatlar Mərkəzinin mətbut xidmətinin rəisi, beynəlxalq məsələlər üzrə ekspert Əziz Əlibəyli bu barədə fikirlərini “Sherg.az”la bölüşüb. O, tərəflərin konstruktiv mövqedə dayandıqlarını düşünür:
“Ankaranın bu ilki planları bir tərəfdən “böyük oyun”dursa, digər tərəfdən əməkdaşlıqları inkişaf etdirməkdir. Fransa- Türkiyə arasında ciddi iş birliyinin olduğunu nəzərə almalıyıq. Eyni zamanda bu il Ankara sazişinin yüz ili tamam olur. Bu amillər tərəflər arasında münasibətlərin qorunmasını şərtləndirir. Hər iki dövlət əməkdaşlıqda maraqlıdır”.
Ə. Əlibəyli proseslərin bu cür inkişaf etməsində ABŞ-ın “əli”ni də istisna etmir:
“Məlumdur ki, həm Türkiyə, həm Fransa NATO ölkəsidir. Onların arasındakı gərginlik ABŞ-dakı yeni iqtidar üçün arzuolunmazdır. Çünki Bayden administrasiyası anti-terror tərəfdarıdır. Yəni, məncə, Türkiyə ilə Fransa arasındakı loyal dialoqlarda rəsmi Vaşinqtonun da xidmətləri var. Potensial qarşıdurma təkcə həmin dövlətlərə deyil, eləcə də, NATO-ya, ABŞ-a ziyan vura bilər. Ona görə də Türkiyə və Fransa toqquşmadan imtina etdilər”.
