Qoşulmama Hərəkatının Parlament Şəbəkəsinin 6 aprel 2025-ci il tarixində Özbəkistan Respublikasının paytaxtı Daşkənd şəhərində keçirilmiş IV konfransında qəbul edilmiş bəyannamədə Qərbi Azərbaycan İcmasının öz yurdlarına sülh yolu ilə, təhlükəsiz və ləyaqətli şəkildə qayıdış səylərinə dəstək ifadə olunub. Bu barədə Qərbi Azərbaycan İcmasının bəyanatında bildirilib. Qeyd edilib ki, Qoşulmama Hərəkatı Parlament Şəbəkəsinin bu qərarı bütövlükdə Qoşulmama Hərəkatının, o cümlədən, onun Parlament Şəbəkəsinin Bandunq Prinsiplərinə sadiqliyini və Qərbi Azərbaycana qayıdışın beynəlxalq sülh və ədalətə xidmət edən mövzu kimi qəbul edilməsini bir daha göstərir.
Bəyanatda vurğulanıb ki, Qərbi Azərbaycan İcması sərgilədiyi ədalətli mövqeyə görə Qoşulmama Hərəkatının Parlament Şəbəkəsinə və Parlament Şəbəkəsinə sədrlik edən Azərbaycan Respublikasının Milli Məclisinə təşəkkür edir.
Qərbi Azərbaycan İcmasının İctimaiyyətlə əlaqələr və Qərbi Azərbaycan Televiziyası şöbəsinin müdiri - Mətbuat Katibi Ülviyyə Zülfiqar “Sherg.az”a bildirib ki, Qoşulmama Hərəkatının Parlament Şəbəkəsinin IV konfransında ifadə olunan dəstək Qərbi azərbaycanlıların geri qayıdışı istiqamətində aparılan işdə mühim əhəmiyyət kəsb edir:
“Bundan əvvəl də beynəlxalq təşkilatlar tərəfindən belə dəstəklər nümayiş olunub. İslam Əməkdaşlıq Təşkilatının (İƏT) 57 dövləti Qərbi azərbaycanlıların geri qayıdışı ilə bağlı dəstəyini göstərib. Yəni qayıdışla bağlı aparılan uğurlar biri-birini əvəz edir. Qərbi Azərbaycan İcması da əldə olunan bütün uğurları dəstəkləyir. Sözügedən uğurların hər biri Qərbi azərbaycanlıların geri qayıdışı istiqamətində verilən mənəvi köməyin nəticəsidir. Eyni zamanda bu uğurlar Azərbaycan dövləti, prezident İlham Əliyev tərəfindən göstərilən qətiyyətlə bağlıdır. Məlum olduğu kimi Qərbi azərbaycanlıların doğma yurdlarına qayıdışı beynəlxalq hüququn norma və prinsiplərinə əsaslanır. Qərbi azərbaycanlıların qayıdışı mütləq şəkildə baş tutmalıdır. Bununla əlaqədar Qərbi Azərbaycan İcması olaraq dəstək verən bütün subyektlərlə yanaşı dövlətlərə və beynəlxalq qurumlara minnətdarlığımızı bildiririk və bu istiqamətdə aparılan naliyyətlərin davamlı olacağına inanırıq”.
