"Bu, hər iki ölkədə turist sayının artmasına gətirib çıxaracaq"
Mədəniyyət naziri Anar Kərimov İranın mədəni irs, turizm və əl işləri sənayesi naziri ilə görüşüb. Mədəniyyət naziri bildirib ki, iki dost ölkənin qədim tarixə malik münasibətlərinin təməli qarşılıqlı etimad üzərində qurulub. O, həmçinin mədəni və humanitar sahədə əməkdaşlığın önəmindən danışıb. Tərəflər işğaldan azad olunmuş tarixi torpaqlarımızda dağıdılmış həm müsəlman, həm də xristian dininə aid məbədlərin eyni həssaslıqla bərpa olunduğunu bildirərək yüksək qiymətləndiriblər. Mədəniyyət paytaxtımız Şuşanın islam dünyası üçün kəsb etdiyi yüksək dəyərdən danışıblar. Eləcə də Qarabağda davam edən yenidənqurma və bərpa işlərində İranın təcrübəsindən yararlanmağın vacibliyi vurğulanıb. Xudafərin körpüsünün birgə bərpası məqsədilə Anlaşma Memorandumunun imzalanması barədə də fikir mübadiləsi aparılıb. Görüş tərəfləri maraqlandıran bir sıra mövzuların müzakirəsi ilə davam edib.
Millət vəkili Vüqar Bayramov deyib ki, İran və Azərbaycan arasında iqtisadi, mədəni əlaqələrin genişləndirilməsi hər iki ölkənin maraqlarına uyğundur. Deputatın sözlərinə görə, İran-Azərbaycan son illərdə xarici ticarət dövriyyəsini artırmağa nail olublar:
“Pandemiyadan əvvəl İranla xarici ticarət dövriyyəmiz yarım milyard dollara qədər yüksəlmişdi. Amma potensial daha böyükdür. Mədəni, nəqliyyat, turizm, iqtisadiyyat sahəsində kifayət qədər böyük imkanlar var. Bu imkanların reallaşması nəticə etibarı ilə hər iki ölkənin dövlət gəlirlərinin artmasına töhfə verəcək. Xudafərin körpüsünün birgə bərpası, gələcəkdə məhz həmin ərazi üzərindən İranla kommunikasiyanın genişləndirilməsi iki tərəfin iqtisadi maraqlarına uyğundur. Bu, hər iki ölkədə turist sayının artmasına gətirib çıxaracaq. Ona görə də qarşılıqlı əməkdaşlıq ölkələrin inkişafı baxımından olduqca vacibdir. Regionda dayanıqlı sülhün dəstəklənməsi aspektindən prioritetdir. Son müzakirələr, bu istiqamətdə atılmış addımlar göstərir ki, Azərbaycan sülhə maraqlı olan qonşularla əməkdaşlığı genişləndirmək niyyətindədir”.
