"Ölkə boyu vətəndaşlarımız nümayişkaranə şəkildə rus soyad sonluqlarından imtinaya başlasınlar"
"Xankəndi yolundakı aksiya əladır. Əməlli-başlı səs gətirir. Hər şey də gözəldir. Amma düşünürəm ki, sadəcə, o yoldakı aksiya ilə işimiz bitməməlidir". Bu barədə siyasi şərhçi, tanınmış jurnalist Azər Həsrət deyib. Ekspert bildirib ki, problemlərin əsas səbəbkarı Rusiyaya yerini göstərmək üçün çox kiçik addımlar atmaq olar:
"Məsələn, ölkə boyu vətəndaşlarımız nümayişkaranə şəkildə rus soyad sonluqlarından imtinaya başlasınlar. Onsuz da 31 illik müstəqillik dönəmində o sonluqlardan hələ də imtina etməməyimiz böyük ayıbdır. Amma yenə də gec deyil. Belə bir mərhələdə rusa aid hər şeydən imtina etməliyik. Balalarını rus məktəbində oxudanlar da bir balaca hərəkətə gəlsinlər və milli məktəbləri seçsinlər. Artıq o da təsdiq və sübut olunub ki, rus məktəbləri iddia edildiyi kimi daha yüksək səviyyəli təhsil vermir. Bir də rus dilini öyrənmək üçün uşağı o məktəbə qoyduğunu iddia edənlər, lütfən, bu cəfəng iddialarınızı yığışdırın. Bir dili öyrənmək üçün 11 il həmin dildə təhsil almağa ehtiyac yoxdur. İlk addım olaraq feysbukda soyad sonluqlarını dəyişməklə başlamaq olar".
