Azərbaycan və Türkiyənin müdafiə nazirləri - Zakir Həsənov və Hulusi Akar videoformatda görüş keçirib. Bu barədə Türkiyə Müdafiə Nazirliyi məlumat yayıb.
Türkiyəli nazir iki ölkənin tarixi və mədəni baxımından bir-birinə bağlı olduğunu, keçmişdəki kimi, indi də bir-birinin yanında olduğunu bildirib.
Azərbaycan Ordusunun 44 günlük Qarabağ zəfərinə toxunan H.Akar "Bir millət, iki dövlət” prinsipinə uyğun olaraq, Qarabağın azad olunmasında da sadiq qalındığını, bunu bütün dünyanı gördüyünü bildirib: "Türkün yumruğu erməninin başına endirildi. 30 ildən bəri davam edən haqsızlıq, oradakı qardaşlarımızın sıxıntıları, çox şükür ki, sona çatdı. Buradakı qalibiyyət tarixə qızıl hərflərlə yazılacaq”.
O, qazanılmış qələbə münasibətilə Azərbaycanı bir daha təbrik edərək deyib ki, Azərbaycan Ordusunun dövrün tələblərinə uyğun yenidən qurulması, modernizasiya edilməsi və iki qardaş ölkənin silahlı qüvvələrinin gələcəkdə də birlikdə fəaliyyət göstərməsi üçün "Yol xəritəsi” hazırlanıb və reallaşdırılmasına başlanılıb.
Hərbi ekspert Ədalət Verdiyev “Sherg.az”a açıqlamasında H. Akarın sözügedən bəyanatı barədə danışdı:
“Bu, Azərbaycan ordusunun Türkiyə modelinə keçməsi proseslərini özündə əks etdirən sənəddir. Beləliklə, həm ştat strukturunda müəyyən dəyişikliklər olacaq, həm də silahlanmada bəzi texniki vasitələrin nomenklaturası həyata keçiriləcək.
Bu “Yol xəritəsi” ancaq iki dövlət arasındadır.
Lakin digər müttəfiq ölkələrlə də ikili əməkdaşlıq mümkündür. Məsələn, Azərbaycan kosmik sahədə ən böyük layihələri Pakistana təqdim edir”.
Ə.Verdiyev Türkiyə ilə hərbi tərəfdaşlığımızın ən pik həddə çatması qənaətindədir:
“Əlbəttə, bu, Ermənistanı narahat edir. Ümumiyyətlə, Cənubi Qafqazda qüvvələr nisbətinin rəsmi Bakının xeyrinə olması məlumdur. Ankara ilə əlaqələrimiz isə bizi daha da gücləndirir. Düzdür, Azərbaycanda Türkiyə hərbi bazasının yaradılması mümkündür.
Lakin bunu zəruri hesab etmirəm. Ən azından ona görə ki, sözügedən təşəbbüs üçün hələ xüsusi şərait yetişməyib. Baza olsa da, olmasa, Türkiyə bizim yanımızdadır.
Tərəflər arasında imzalanan müqavilələr də Türkiyənin lazımi anda Azərbaycana hərbi dəstək verəcəyini təsdiq edir. Yəni baza yalnız formal xarakter daşıya bilər”.
