Pakistanda 9 aylıq Məhəmməd Musanın məhkəməsi olub.
ANS PRESS-in məlumatına görə, məhkəmə qarşısına çıxarılan Musa qətl cəhdində, polisi təhdid etməkdə və hakimiyyət nümayəndəsinə qarşı müqavimətdə ittiham olunmasına baxmayaraq məhkəmədə bəraət alıb.
Hakimin qərarı ilə Musaya qarşı irəli sürülmüş ittihamlar yetərsiz sayılıb.
Musanın müttəhimlər kürsüsündə oturmuş atasının qucağında, ağzında əmzik çaşqın baxışlarla baxdığı zaman çəkilmiş fotosu dünyada böyük rezonans yaratmışdı.
Musanın ailəsi qərardan məmnun qaldığını bildirib."Bundan sonra nəvəmin başına bir iş gələrsə, bilin ki, günahkar polisdir", - deyə Musanın babası bildirib.
Musanın atası Əmi Yasin baş verənləri "axmaqlıq" adlandırıb.
Qeyd edək ki, Pakistan tarixində ilk dəfə olaraq müttəhimlər kürsüsündə 9 aylıq uşaq oturdulmuşdu. Ağzında əmzik olan balaca Məhəmməd Musa Xan atasının qucağında idi. O, qətlə cəhd, polisi hədələmək və dövlət qurumlarının fəaliyyətinə kobud müdaxilədə suçlanırdı.
